الماتىدا مەدەۋ اۋدانى اكىمدىگى مەن «الماتى سۋ» مكك وكىلدەرى «كامەنسكوە پلاتو» شاعىن اۋدانىنىڭ تۇرعىندارىمەن كەزدەستى.
ونىڭ بارىسىندا سۋىق سۋمەن جابدىقتاۋ ماسەلەسىن شەشۋ جولدارى ءتۇسىندىرىلدى، دەپ حابارلايدى Almaty-akshamy.kz
ەسكە سالساق، «كامەنسكوە پلاتو» شاعىن اۋدانىندا سۋ تاپشىلىعى سوڭعى 5 جىلدا بايقالدى. وسى ەلدى مەكەننىڭ تۇرعىندارىن سۋمەن قامتاماسىز ەتۋ جەر استى سۋلارىنىڭ كوزىنەن جۇزەگە اسىرىلادى – بۇل مۇنداعى ءۇش سكۆاجينا. ماماندار سۋ قىسىمىنىڭ تومەندەۋىنىڭ نەگىزگى سەبەبىن وسى ايماقتاعى حالىقتىڭ وسۋىمەن بايلانىستىرادى. سكۆاجينالارداعى سۋ دەڭگەيى 2،5 ەسە تومەندەدى – جوبالىق 150 م3/ساع-تان 60 م3/ساع-قا دەيىن جانە سۋ دەڭگەيىنىڭ تومەندەۋى جالعاسۋدا.
بۇل ماسەلەنى شەشۋ ءۇشىن 2023 جىلى الماتى قالاسىنىڭ اكىمى ەربولات دوسايەۆتىڭ تاپسىرماسى بويىنشا تج جەلىسى بويىنشا ەكى جاڭا سۋ كوزدەرىن (4 سكۆاجينا) جايلاستىرۋ جانە ىسكە قوسۋ، سونداي-اق حالىققا سۋ بەرۋدى ۇلعايتۋ ءۇشىن مودۋلدىك ستانسيالارى بار جاڭا رەزەرۆۋارلار مەن ماگيسترالدىق قۇبىرلار سالۋ جونىندەگى جوبانى ازىرلەۋ باستالدى. قۇرىلىس-مونتاج جۇمىستارى مامىر ايىندا باستالىپ، اعىمداعى جىلدىڭ جەلتوقسان ايىندا اياقتالادى دەپ جوسپارلانۋدا. جوبانى ىسكە اسىرۋ «كامەنسكوە پلاتو»، «كولساي»، «يۋبيلەينىي» جانە «مۇزتاۋ» شاعىن اۋداندارىن تۇراقتى سۋمەن قامتاماسىز ەتۋگە مۇمكىندىك بەرەدى.
جۇمىستار اياقتالعان سوڭ جوبانىڭ كەلەسى كەزەڭ «كامەنسكوە پلاتو» شاعىن اۋدانىن قولدانىستاعى سۋمەن جابدىقتاۋ جەلىلەرىمەن قوسۋ بولادى. ول ءۇشىن سۋ قۇبىرى مەن كارىزدىڭ تاراتۋ جەلىلەرىن سالۋ بويىنشا جوبا ازىرلەندى، ول جۇرگىزىلگەن قۇرىلىس-مونتاجداۋ جۇمىستارىن ەسكەرە وتىرىپ تۇزەتىلەتىن بولادى. جوبانى ىسكە اسىرۋ 2024 جىلعا جوسپارلانعان.
قازىرگى ۋاقىتتا تۇرعىندارعا سۋ بەرۋ پروبلەمالارىنا بايلانىستى كۇندەلىكتى قوسىمشا تاسىمالداۋ ۇيىمداستىرىلدى. بۇل جاعداي قالا اكىمدىگىنىڭ باقىلاۋىندا.