بيىل 4،4 ملن ادام الاتىن زەينەتاقى مەن جاردەماقىنىڭ بارلىق ءتۇرى قايتا ەسەپتەلدى
ەلىمىزدە 1 شىلدەدەن باستاپ ەڭبەك ەتۋ قابىلەتىنەن جانە اسىراۋشىسىنان ايىرىلۋىنا بايلانىستى بەرىلەتىن الەۋمەتتىك تولەمدەر كوبەيتىلەدى، دەپ حابارلايدى Almaty-akshamy.kz.
پرەزيدەنت قاسىم-جومارت توقايەۆتىڭ تاپسىرماسىنا سايكەس 1 شىلدەدەن باستاپ مەملەكەتتىك الەۋمەتتىك ساقتاندىرۋ قورىنان تولەنەتىن ەڭبەك ەتۋ قابىلەتىنەن جانە اسىراۋشىسىنان ايىرىلۋىنا بايلانىستى بەرىلەتىن الەۋمەتتىك تولەمدەردىڭ مولشەرى 14،5%-عا ۇلعايتىلادى. ق ر پرەمەر-مينيسترى ءاليحان سمايىلوۆ ۇكىمەتتىڭ ءتيىستى قاۋلىسىنا قول قويدى.
مەملەكەت باسشىسى قاسىم-جومارت توقايەۆ وسى ساناتتاعى تۇلعالاردى قولداۋ شارالارىن كۇشەيتۋ قاجەتتىگىن وسى جىلدىڭ 29 ناۋرىزىندا وتكەن VIII شاقىرىلىمداعى پارلامەنتتىڭ ءبىرىنشى سەسسياسىنىڭ اشىلۋىندا اتاپ ءوتتى. ەڭبەك ەتۋ قابىلەتىنەن ايىرىلۋىنا بايلانىستى الەۋمەتتىك تولەمدەرمەن 92 مىڭعا جۋىق ادام، اسىراۋشىسىنان ايىرىلۋىنا بايلانىستى بەرىلەتىن الەۋمەتتىك تولەمدەرمەن 61 مىڭ وتباسى قامتىلادى دەپ جوسپارلانىپ وتىر.
وسى قاۋلى 2023 جىلعى 1 شىلدەدەن باستاپ قولدانىسقا ەنگىزىلەدى جانە رەسمي جاريالانۋعا جاتادى.
مەملەكەت ازاماتتاردىڭ تابىسىن ارتتىرۋ بويىنشا ءىس-شارالاردى تۇراقتى نەگىزدە قابىلداپ كەلە جاتقانىن ايتا كەتۋ كەرەك. مىسالى، بيىل 1 قاڭتاردان باستاپ رەسپۋبليكاداعى ەڭ تومەنگى ەڭبەكاقى مولشەرى 60 مىڭنان 70 مىڭ تەڭگەگە دەيىن كوبەيتىلدى. بۇل ەكونوميكانىڭ بارلىق سالاسىندا جۇمىس ىستەيتىن 1،8 ملن-عا جۋىق جالدامالى جۇمىسكەر مەن ەڭبەك ادامىن قامتىدى. ەڭ تومەنگى ايلىق كورسەتكىشى ارقىلى ەڭبەكاقى دەڭگەيىن بەلگىلەيتىن ۇيىمدار بىلىكتىلىكتىڭ سانات ارالىق جۇيەسىن ەسكەرە وتىرىپ، وزگە دە ساناتتاعى جۇمىسشىلاردىڭ ەڭبەكاقىسىن ءوسىرۋ جاعىنا قاراي قايتا قاراستىرادى.
بيىل 4،4 ملن ادام الاتىن زەينەتاقى مەن جاردەماقىنىڭ بارلىق ءتۇرى قايتا ەسەپتەلدى.
سونىمەن قاتار دارىگەرلەردىڭ، مۇعالىمدەردىڭ، بيۋدجەتتىك سالانىڭ باسقا دا قىزمەتكەرلەرى مەن ءوندىرىس جۇمىسشىلارىنىڭ جالاقىسىن كەزەڭ-كەزەڭمەن ارتتىرۋدى جانە جوبا اۋقىمىن كەڭەيتۋ بويىنشا 2025 جىلعا دەيىنگى حالىقتىڭ تابىسىن ارتتىرۋ باعدارلاماسىن جۇزەگە اسىرۋ جۇمىستارى جالعاسىن تاپتى. سونداي-اق شاعىن نەسيەلەردى قولجەتىمدى ەتۋ ارقىلى اۋىل تۇرعىندارىنىڭ تابىسىن ارتتىرۋ بويىنشا جوبانى كەڭەيتۋ جۇمىستارى باستالدى.