جاڭا وقۋ جىلىندا 3،6 ملن بالانى قامتيتىن 7 637 مەكتەپ جۇمىس ىستەيدى.
1 قىركۇيەكتە رەسپۋبليكانىڭ بارلىق مەكتەبىندە ءبىلىم كۇنىنە ارنالعان سالتاناتتى جيىن، سونداي-اق «بىلىمگە ۇمتىلۋ، ەڭبەكسۇيگىشتىك جانە پاتريوتيزم» تاقىرىبىندا سىنىپ ساعاتى وتەدى. بۇل تۋرالى ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ الاڭىندا وتكەن باسپا ءسوز كونفەرەنسياسىندا وقۋ-اعارتۋ ۆيسە-مينيسترى شولپان كارينوۆا مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«سالتاناتتى ساپتى وتكىزۋدىڭ فورماتىن، قاتىسۋشىلاردىڭ قۇرامىن ءبىلىم بەرۋ ۇيىمدارى وزدەرى بەلگىلەيدى. وقۋ جىلى 1 قىركۇيەكتە باستالىپ، 31 مامىرعا دەيىن 36 اپتاعا سوزىلادى. جازدىڭ العاشقى كۇندەرىنەن باستاپ وقۋشىلار دەمالادى، ياعني جازدا بالالار دەمالادى»، - دەدى ۆيسە-مينيستر شولپان كارينوۆا.
وقۋ جىلىنىڭ ۇزاقتىعىنىڭ ۇلعايۋىنا بايلانىستى جاڭا وقۋ جىلىندا بەس كۇندىك فورماتتا 7 مىڭنان استام مەكتەپ جۇمىس ىستەيدى، بۇل ءۇش اۋىسىمدى مەكتەپتەردى قوسپاعاندا، 3،4 ملن بالا مەن 300 مىڭنان استام ءمۇعالىم.
سەنبى دەمالىس كۇنى بولادى، سونىڭ ارقاسىندا وقۋشىلار، مۇعالىمدەر، مەكتەپ ديرەكتورلارى مەن ونىڭ ورىنباسارلارى وقۋ جىلىندا قوسىمشا 36 كۇن دەمالادى.
جاڭا وقۋ جىلىندا مەكتەپتەردىڭ وقۋ باعدارلاماسىنا ءبىرقاتار وزگەرىس ەنگىزىلدى.
زەرتتەۋ جانە حالىقارالىق تاجىريبەنى زەردەلەۋ قورىتىندىسىنا سايكەس 1-سىنىپ وقۋشىسىنىڭ ءۇش ءتىلدى بىردەن مەڭگەرۋى قيىن ەكەنى انىقتالدى. بالا ەڭ الدىمەن ءوز انا تىلىندە وقىپ، جازۋدى ۇيرەنۋى كەرەك.
سوندىقتان وقۋ-اعارتۋ مينيسترلىگى مەملەكەتتىك تىلدە وقىتاتىن 1-سىنىپتاردا بالالار تەك قازاق ءتىلىن، ورىس تىلىندە وقىتاتىن سىنىپتاردا مەملەكەتتىك جانە ورىس تىلدەرىن ۇيرەتەتىنى تۋرالى شەشىم قابىلدادى.
«قازاق تىلىندە وقىتاتىن مەكتەپتەردە 2-سىنىپتان باستاپ ورىس ءتىلىن وقىتۋ باستالادى. اعىلشىن ءتىلى بارلىق مەكتەپتە ءۇشىنشى سىنىپتان باستاپ وقىتىلادى. سونداي-اق 1-سىنىپتا بالالارعا ەرتە كاسىپتىك باعدار بەرۋ ماقساتىندا «ەڭبەككە باۋلۋ» جانە «بەينەلەۋ ونەرى» پاندەرى ەنگىزىلدى»، - دەدى شولپان كارينوۆا.
بيىلعى وقۋ جىلىندا 5-11 سىنىپتاردا «جاھاندىق قۇزىرەتتەر» فاكۋلتاتيۆتىك كۋرسىن وقىتۋ جالعاسادى. كۋرستا «ادالدىق جانە ەتيكا»، «ەكولوگيالىق مادەنيەت»، «ازاماتتىق»، «تىرشىلىك قاۋىپسىزدىگىنىڭ نەگىزدەرى»، «مەدياساۋاتتىلىق جانە قارجىلىق ساۋاتتىلىق» مودۋلدەرى بار.
جاڭا وقۋ جىلىندا مەكتەپ فورماسىنا قويىلاتىن تالاپتار وزگەرمەيدى. ياعني وقۋشىلار مەكتەپكە بۇرىن ساتىپ العان نەمەسە بيىلعى وقۋ جىلىندا دايىنداعان فورمامەن بارا الادى. مەكتەپ فورماسى جوقتار تازا، ۇقىپتى كلاسسيكالىق كيىم ۇلگىسىمەن مەكتەپكە بارا الادى.
بيىلدان باستاپ وقۋ-اعارتۋ مينيسترلىگى ماتەريالدىق كومەك كورسەتۋ ەرەجەلەرىنە وزگەرىستەر ەنگىزدى، بۇعان دەيىن وڭىرلەردە بولىنگەن سوما 17-دەن 40 مىڭ تەڭگەگە دەيىن بولسا، بيىل بۇل سوما ۇلعايدى جانە ەڭ تومەنگى كۇنكورىس دەڭگەيىنەن كەم بولماۋى كەرەك، ياعني 37 389 تەڭگە. كومەك كورسەتۋ مەحانيزمىنە دە وزگەرىستەر ەنگىزىلدى.
ەندى قاراجات اتا-انالاردىڭ بالالارىمەن بىرگە مەكتەپ فورماسىن، اياق كيىمىن، كەڭسە تاۋارلارىن جانە باسقالاردى ساتىپ الۋى ءۇشىن بانكتەگى شوتىنا اۋدارىلادى.