213 مەكتەپ تولىق جوندەۋدەن وتەدى.
پرەمەر-مينيستر قازىرگى تاڭدا ءبىلىم بەرۋ وبەكتىلەرىنىڭ ءبارى بىردەي قاۋىپسىزدىك تالاپتارىنا ساي ەمەس ەكەنىن ايتىپ ءوتتى، دەپ حابارلايدى Almaty-akshamy.kz
«بۇل ماسەلەنى ەرەكشە باقىلاۋعا الىپ، بالالاردىڭ قاۋىپسىزدىگى ءۇشىن تەز ارادا ءتيىستى شارالاردى قابىلداۋ قاجەت»، — دەدى ءاليحان سمايىلوۆ.
ۇكىمەت باسشىسى مىنا ماسەلەلەرگە نازار اۋداردى
ءبىرىنشى. ءبىلىم بەرۋ نىساندارىنىڭ ءبارى وقۋ جىلىنا 100% دايىن بولۋى ءتيىس.
ەكىنشى. ءوڭىر اكىمدىكتەرى ءبىلىم بەرۋ ۇيىمدارىنىڭ بەينەباقىلاۋ جۇيەلەرىن ىشكى ىستەر ورگاندارىنىڭ جەدەل باسقارۋ ورتالىقتارىنا شىعارۋدى جەدەلدەتۋى قاجەت. • سونىمەن قاتار مەكتەپتەردى كۇزەتۋگە ليسەنزيالانعان ۇيىمداردى تارتۋ جونىندەگى تالاپتاردىڭ ساقتالۋىن قامتاماسىز ەتسىن. • وقۋ-اعارتۋ مينيسترلىگى ىشكى ىستەر مينيسترلىگىمەن بىرلەسىپ، ءبىلىم بەرۋ باعدارلاماسىنا جول قوزعالىسى ەرەجەلەرىن ۇيرەتۋدى مىندەتتى تۇردە ەنگىزۋ، جۇمىس ىستەپ جۇرگەن ينسپەكتورلاردى وسى جۇمىسقا تارتۋ ماسەلەسىن قاراستىرسىن.
ءۇشىنشى. ءوڭىر اكىمدىكتەرى كومەككە مۇقتاج بالالاردى مەملەكەتتىك قولداۋ شارالارىمەن 100% قامتاماسىز ەتۋى قاجەت. • مەكتەپ تاۋارلارىن تومەن باعامەن ساتۋ ءۇشىن مەكتەپ جارمەڭكەلەرىن جانە شالعاي اۋىلدارعا شىعاتىن اۆتودۇكەندەردى ۇيىمداستىرۋ قاجەت. • ساۋدا مينيسترلىگى «اتامەكەن» پالاتاسىمەن جانە اكىمدىكتەرمەن بىرلەسىپ، مەكتەپكە قاجەتتى كەرەك-جاراقتار باعاسىنىڭ تۇراقتى بولۋىن قامتاماسىز ەتسىن. • يندۋستريا مينيسترلىگى «اتامەكەن» پالاتاسىمەن بىرلەسىپ، مەكتەپ فورماسىنىڭ قۇنىنا قاتىستى ماسەلەنى پىسىقتاسىن.
ءتورتىنشى. ءوڭىر اكىمدىكتەرى مەكتەپتەرگە وقۋلىقتاردىڭ قاجەتتى سانىن جەتكىزۋدى قامتاماسىز ەتسىن.
بەسىنشى. عىلىم جانە جوعارى ءبىلىم مينيسترلىگى جانە ءوڭىر اكىمدىكتەرى جوعارى وقۋ ورىندارى مەن كوللەدجدەردىڭ باسقا قالالاردان كەلگەن ستۋدەنتتەرىن جاتاقحانالارداعى ورىندارمەن قامتاماسىز ەتۋ جونىندە شارالار قابىلداسىن.