كونفەرەنسيانىڭ ماقساتى – ەرەكشە ءبىلىم بەرۋدى قاجەت ەتەتىن بالالاردىڭ ءبىلىم الۋىنىڭ وزەكتى ماسەلەلەرىن تالقىلاۋ، ءبىلىم بەرۋ قىزمەتتەرىنىڭ ساپاسىن قورىتىندىلاۋ.
وڭىرلىك كوممۋنيكاسيالار قىزمەتىندە وتكەن بريفينگتە 17 تامىزدا اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە پەداگوگيكالىق قىزمەتكەرلەردىڭ رەسپۋبليكالىق تامىز كونفەرەنسياسىنىڭ پلەنارلىق سەكسيالىق وتىرىسى وتەتىنى ايتىلدى، دەپ حابارلايدى Almaty-akshamy.kz
بۇل تۋرالى ق ر وقۋ-اعارتۋ مينيسترلىگىنىڭ «ارنايى جانە ينكليۋزيۆتىك ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعى» رمم ورتالىعىنىڭ ديرەكتورى ايكەرىم كۇدەرينوۆا مالىمدەدى.
سپيكەردىڭ ايتۋىنشا، بيىلعى تامىز كونفەرەنسياسىنىڭ تاقىرىبى «ەرەكشە ءبىلىم بەرۋدى قاجەت ەتەتىن بالالاردى پسيحولوگيالىق-پەداگوگيكالىق سۇيەمەلدەۋ» بولادى.
«كونفەرەنسيانىڭ نەگىزگى ماقساتى – ەرەكشە ءبىلىم بەرۋدى قاجەت ەتەتىن بالالاردىڭ ارنايى جانە ينكليۋزيۆتى ءبىلىم الۋىنىڭ وزەكتى ماسەلەلەرىن تالقىلاۋ، تاجىريبە الماسۋ، ارنايى ءبىلىم بەرۋ ءۇشىن پەداگوگ كادرلار دايارلاۋ، ءبىلىم بەرۋ قىزمەتتەرىنىڭ ساپاسىن قورىتىندىلاۋ ماسەلەلەرى. سونىمەن قاتار، بۇل پەداگوگيكالىق قوعاممەن ديالوگ بولادى. ءىس-شاراعا جاڭاشىل پەداگوگتار، ءبىلىم بەرۋ ۇيىمدارىنىڭ ۇزدىك باسشىلارى، ساراپشىلار مەن اتا-انالار قوعامىنىڭ وكىلدەرى قاتىسادى. سپيكەرلەر دوڭگەلەك ۇستەلدەر، شەبەرلىك سىنىپتارى مەن پرەزەنتاسيالار وتكىزەدى»، - دەدى ا.كۇدەرينوۆا.
قازىرگى ۋاقىتتا قازاقستان رەسپۋبليكاسىندا 457 ارنايى ءبىلىم بەرۋ ۇيىمى جۇمىس ىستەيتىنىن اتاپ ءوتۋ كەرەك. ونىڭ ىشىندە وبلىستار مەن قالالار بويىنشا ارنايى مەكتەپكە دەيىنگى ۇيىمدار – 45، ارنايى مەكتەپ ۇيىمدار – 99، پسيحولوگيالىق-پەداگوگيكالىق تۇزەۋ كابينەتتەرى – 213، پسيحولوگيالىق-مەديسينالىق-پەداگوگيكالىق كەڭەستەر – 87، وڭالتۋ ورتالىقتارى – 13. ەرەكشە ءبىلىم بەرۋدى قاجەت ەتەتىن بالالاردى وقىتۋ مەن تاربيەلەۋ ينكليۋزيۆتى ءبىلىم بەرۋدى ىسكە اسىراتىن جالپى ءبىلىم بەرەتىن مەكتەپتەر مەن بالاباقشالاردا، جالپى ءبىلىم بەرەتىن ۇيىمدار جانىنداعى ارنايى توپتار مەن سىنىپتاردا دا جۇزەگە اسىرىلادى.