وتباسى بانكى "ناۋرىز" جاڭا يپوتەكالىق باعدارلاماسىنىڭ شارتتارى تۋرالى مالىمدەدى، دەپ حابارلايدى Almaty-akshamy.kz.
"وتباسى بانكى" باسقارما ءتوراعاسىنىڭ ورىنباسارى نۇرلان اقشانوۆتىڭ ايتۋىنشا، باعدارلامانىڭ شارتتارى كەلەسىدەي بولادى:
الەۋمەتتىك وسال ازاماتتار ءۇشىن جىلدىق 7% مولشەرلەمە؛
قالعان ساناتتاعى ازاماتتار ءۇشىن جىلدىق 9% مولشەرلەمە؛
20% - باستاپقى جارنا؛
19 جىلعا دەيىن – نەسيەلەۋ مەرزىمى.
"قازاقستاننىڭ بارلىق ازاماتتارى، سونداي-اق 18 جاستان 63 جاسقا دەيىنگى قانداستار ۇمىتكەر بولا الادى. ءبىراق، سوڭعى بەس جىل ىشىندە سىزدە جىلجىمايتىن مۇلىك نەمەسە مەنشىك قۇقىعىنداعى جىلجىمايتىن مۇلىك بويىنشا ارەكەتتەر بولماۋ كەرەك. سونداي – اق، الدىڭعى "وتاۋ" باعدارلاماسىنان ايىرماشىلىعى، ءبىز دەپوزيت مەرزىمى بويىنشا شارتتار قويمايمىز، ياعني ءسىز دەپوزيتتى 30 ساۋىردە اشىپ، 1 ملن تەڭگەگە تولىقتىرا الاسىز جانە ىرىكتەۋگە قاتىسا الاسىز"، - دەپ اتاپ ءوتتى نۇرلان اقشانوۆ ۇكىمەتتەگى بريفينگتە.
"ناۋرىز" باعدارلاماسى بويىنشا قولجەتىمدى بارلىق جىلجىمايتىن مۇلىك "باسپانا ماركەت" پورتالىندا ورنالاستىرىلادى. ءبىرىنشى جىلى 300 ملرد تەڭگە سوماسىنا 12 مىڭ قارىز جانە ودان ءارى جىل سايىن 8 مىڭ قارىز بەرۋ ءۇشىن 200 ملرد تەڭگەدەن بەرۋ جوسپارلانۋدا.
"قارىزدار استانا، الماتى، شىمكەنت قالالارىندا جانە وبلىس ورتالىقتارىندا باستاپقى تۇرعىن ۇيگە جانە مونوقالالار مەن اۋىلدىق ەلدى مەكەندەردە قايتالاما تۇرعىن ۇيگە بەرىلەتىن بولادى، ءبىراق جىلىنا بولىنگەن قاراجاتتىڭ جالپى كولەمىنىڭ 30% – دان اسپايدى"، - دەپ ناقتىلادى ونەركاسىپ جانە قۇرىلىس ءمينيسترى قانات شارلاپايەۆ.
جالپى، باعدارلاما سەگىز جىلعا سوزىلادى. بيىل جەتكىلىكتى اقشا جيناماعان نەمەسە 18 جاسقا تولماعان ادامدار بولاشاقتا باعدارلامانى پايدالانۋعا مۇمكىندىك الادى.