ەلىمىزدە اۋەجايلار ماڭىندا 1 200-دەن استام جەر ۋچاسكەسى زاڭسىز بەرىلگەن. بۇل تۋرالى ۇكىمەت وتىرىسىندا يندۋستريا جنە ينفراقۇرىلىمدىق دامۋ ءمينيسترى مارات قارابايەۆ ايتتى، دەپ حابارلايدى Almaty-akshamy.kz.
«باس پروكۋراتۋرانىڭ تەكسەرىس جۇرگىزۋى بارىسىندا اۋەجايلاردىڭ سانيتارلىق-قورعاۋ ايماعىنىڭ شەكاراسىندا جەرگىلىكتى اتقارۋشى ورگانداردىڭ 1 200-گە جۋىق ۋچاسكە بەرگەنى انىقتالدى. ولاردا 900-دەن استام عيمارات سالىنعان. سونداي-اق، اەرودروم ماڭىنداعى اۋماقتاردا، اۋەجاي كوميسسيالارىنىڭ كەلىسىمىنسىز 100 مىڭنان استام ءتۇرلى وبەكتىلەردى سالۋ فاكتىلەرى بار. زاڭسىز قۇرىلىس سالۋ بويىنشا نەعۇرلىم كۇردەلى جاعداي الماتى، شىمكەنت، اتىراۋ جانە اقتوبە قالالارىندا بايقالادى»، - دەدى مينيستر.
ونىڭ اتاپ وتۋىنشە، اەرودروم ماڭى اۋماقتارىن پايدالانۋ بويىنشا ناقتى تالاپتاردى بەلگىلەۋ ماقساتىندا اەرودروم اينالاسىندا ورنالاسقان جەر ۋچاسكەلەرىنە قۇقىقتار بەرۋ تارتىبىنە تۇزەتۋلەر ەنگىزىلدى.
«قازاقستاننىڭ اۆياسيالىق اكىمشىلىگىنە ۇشۋ قاۋىپسىزدىگىنە قاتەر توندىرەتىن قىزمەتتەرگە رۇقسات بەرۋ قۇزىرەتى بەرىلگەن. جەرگىلىكتى اتقارۋشى ورگاندار تاراپىنان جەر ۋچاسكەلەرىن بەرۋ كەزىندە زاڭناما تالاپتارىن ساقتاۋ جونىندە پارمەندى ءىس-شارالار قابىلداۋى، سونداي-اق بۇرىن تۇرعىزىلعان زاڭسىز قۇرىلىستار بويىنشا ءتيىستى ءىس-شارالار اتقارۋى قاجەت»، - دەدى مارات قارابايەۆ.