ەلدە اۋە قاتىناسىنا سۇرانىس ارتىپ كەلەدى.
وتكەن جىلى وتاندىق كومپانيالار 11 ملن جولاۋشىنى تاسىمالداعان. سالادا سەرپىلىس بار، ءبىراق سۇرانىس كوبەيگەن سايىن مامان تاپشىلىعى ماسەلەسى دە سەزىلۋدە، دەپ حابارلايدى Almaty-akshamy.kz.
24.kz اقپاراتىنا جۇگىنسەك، ساراپشىلاردىڭ ايتۋىنشا، قازاقستاندا بىلىكتى ۇشقىشتار جەتىسپەيدى. سوندىقتان وتاندىق اۋە كومپانيالارى ولاردى امالسىز شەتەلدەن شاقىرۋعا ءماجبۇر. العاشقى 4 ايدا وتاندىق اۋە كومپانيالارى 4 ملننان اسا جولاۋشى تاسىدى. ودان بولەك بىلتىر ەلدە 410 مىڭ ۇشاققا قىزمەت كورسەتىلدى. بۇل 2021 جىلمەن سالىستىرعاندا 90%-عا ارتىق. رەسمي ستاتيستيكا اۋەدەگى قوزعالىستىڭ قارقىندى ءوسىپ جاتقانىن كورسەتەدى. الايدا نارىقتاعى سۇرانىستى بىلىكتى وتاندىق ماماندارمەن قامتاماسىز ەتە الماي وتىرمىز. ءقازىر ازاماتتىق اۆياسيا اكادەمياسىندا 1400 ادام وقيدى. جىلىنا 400 تۇلەك بىتىرەدى. ونىڭ 40-عى ۇشقىش. ءبىراق بۇل جەتكىلىكسىز. ونىڭ ۇستىنە تۇلەكتەردىڭ بىلىكتىلىگىنە دە سۇراق كوپ.
«ۇشقىشتار سالاسىندا كەلسەك، كىشكەنە ماسەلەلەر بار. ويتكەنى ەير استانادا ەۋرووداقتىڭ دارەجەسىندەگى تالاپ بار. ءبىز وعان جەتكەن جوقپىز. وعان دايىنداپ جاتىرمىز. ەندى ەۋروپا وداعىنىڭ تالابىنا ساي كەلەدى دەپ جاتىرمىز. ءبىراق سەرتيفيكاتىمىزدى ءالى العان جوقپىز. ءبىزدىڭ ستراتەگيامىز بويىنشا 2025 جىلى ەۋروپا وداعىنىڭ سەرتيفيكاتىن الۋىمىز كەرەك»، - دەيدى ازاماتتىق اۆياسيا اكادەمياسىنىڭ رەكتورى بەكەن سەيداحمەتوۆ.
ەلدە ۇشقىشتاردى دايىندايتىن جالعىز اكادەميا وسى. ءقازىر مۇنداعىلار الەمدەگى ۇزدىك وقۋ ورىندارىنا بەرىلەتىن ەۋروپالىق سەرتيفيكاتتى الۋعا دايىندالىپ جاتىر. ءبىراق اكادەميا ءالى دە تەحنيكالىق جابدىققا ءزارۋ. ءبىلىم ورداسىنا ۇشاقتان باستاپ، جوعارعى ستاندارتتارعا ساي زاماناۋي قۇرىلعىلار قاجەت.
«جەتىسپەيتىن تىكۇشاقتار بار. 2015 جىلدان باستاپ تىكۇشاقتاردى دايىنداۋ ءجۇرىپ جاتىر. تىكۇشاق جوق بولعانان كەيىن جالعا الامىز. ۇشاقتاردىڭ دا جەتىسپەۋشىلىگى بار. ءوزىمىزدىڭ ۇشاقتار بار، ءبىراق ۇشقىشتاردىڭ تكوپتىگىنەن ءبىز ۇشاقتاردى ارەنداعا الۋعا ءماجبۇرمىز»، - دەيدى ازاماتتىق اۆياسيا اكادەمياسىنىڭ ۇشۋ جاتتىعۋ، ۇشقىشتاردى دايىنداۋ، ۇشۋ ورتالىعىنىڭ ديرەكتورى داۋلەت تورەاحمەتوۆ.
اكادەمياداعى وقىتۋشىلار مەن نۇسقاۋشىلاردىڭ دا بىلىكتىلىگىن ارتتىرۋ كەرەك. ءقازىر ءبىرقاتارى ەۋروپادا وقىپ جاتىر. مامان تاپشىلىعىن شەشۋگە اۋە كومپانيالارىنىڭ وزدەرى دە اتسالىسۋدا. سونىڭ ءبىرى - ەير استانا كومپانياسى. ولار ازاماتتاردى تولىق وقىتىپ، جۇمىسقا قابىلداپ جاتىر.
«ءقازىر الەمدەگى الپاۋىت كومپانيالارىنىڭ باسىم بولىگىندە مامان تاپشى. تيىسىنشە، بىزدە دە دەفيسيت بار. ۇشقىشتاردىڭ جەتكىلىكتى بولعانىمەن، الدا جاڭا اۋە كەمەلەرى قوسىلادى. سوندىقتان شەتەلدەگى بىلىكتى مامانداردىڭ كومەگىنە جۇگىنەمىز. وتاندىق مامانداردى دايارلاۋعا دا اتسالىسىپ جاتىرمىز. ءبىزدىڭ ارنايى باعدارلامامىز ارقىلى وقىپ، ءقازىر جۇمىس ىستەپ جۇرگەن قىزمەتكەرلەرىمىز بار»، - دەيدى اۋە كومپانياسىنىڭ مەنەدجەرى ءىلياس يسابايەۆ.
سالا ماماندارىنىڭ پىكىرىنشە، ماسەلەنى شەشۋ ءۇشىن ءبىلىم بەرۋ ىسىنە ينۆەستيسيا تارتۋ كەرەك. سوندا كاسىبي ۇشقىشتار عانا ەمەس، تەحنيكالىق مامانداردى دا كوبەيتۋگە مۇمكىندىك بولادى. مامان تاپشىلىعى الەم بويىنشا بار كورىنەدى.
«الەمدە اۋە قاتىناسىنا سۇرانىس ارتىپ وتىر. تيىسىنشە، مامان تاپشىلىعىمەن جاھانداعى كەز كەلگەن اۋە كومپانياسى كەزىگىپ وتىر. ءبىز ءبىلىم بەرۋ جۇيەسىنە ينۆەستيسيا تارتۋدى جەدەلدەتۋىمىز كەرەك. كەي اۋە كومپانيالارى ۇشقىشتاردى وزدەرى وقىتادى. بۇل تاجىريبەگە دە ءمان بەرگەن ءجون. سالانى سەرپىلتۋگە مەملەكەتتىڭ قولداۋى دا ارتىق ەتپەيدى»، - دەيدى قازاقستاننىڭ اۆياسيالىق اكىمشىلىگىنىڭ باس ديرەكتورى كاتالين رادۋ.
ءقازىر ەلدەگى اۆياسيا سالاسىندا 20 مىڭ ادام جۇمىس ىستەيدى. جىلدان-جىلعا مامان تاپشىلىعى ماسەلەسى كوبەيىپ كەلەدى. ءبىراق ناقتى قاي ماماندىققا ادام كەرەك، قاي باعىتتا تاپشىلىق كوپ ەكەنى زەرتتەلمەيدى. ازاماتتىق اۆياسيا وكىلدەرى قولدا ناقتى ستاتيستيكا بولسا، سول باعىتقا باسىمدىق بەرەر ەدىك دەيدى.