بيۋدجەت قارجىسى الدىمەن كۆازيمەملەكەتتىك كومپانيالارعا بولىنەدى.
ولار ءوز كەزەگىندە تاعى قوسىمشا قاراجات تارتىپ، كاسىپكەرلەرگە تومەندەتىلگەن مولشەرلەمەمەن كرەديت بەرە الادى، دەپ حابارلايدى Almaty-akshamy.kz
قارجى ءمينيسترىنىڭ ايتۋىنشا، 0،1 پروسەنت بۇل تىم تومەن مولشەرلەمە ەمەس.
ەرۇلان جاماۋبايەۆ بيۋدجەتتىك كرەديتتەردىڭ نە سەبەپتى تومەنگى مولشەرلەمەمەن بەرىلەتىنىن ءتۇسىندىردى.
بۇگىن سەنات وتىرىسىنان كەيىن جۋرناليستەر الەۋمەتتىك جەلىدە تاراعان ۇكىمەت باسشىسىنىڭ قاۋلىسىنا تۇسىنىكتەمە بەرۋدى سۇرادى. وسى قۇجاتتا بيۋدجەتتىك كرەديتتەر تۋرالى جازىلعان. مولشەرلەمەسى وتە تومەن، نەبارى 0،1 پروسەنت. ونداي كرەديتتەر «بايتەرەك» ۇلتتىق حولدينگى ارقىلى سان الۋان جوبالارعا تاراتادى.
ماسەلەن، 55 ميلليارد تەڭگە جۇك كولىكتەرىنىڭ جەتەكشى بەلدەمەلەرىنىڭ ارقالىقتارىن كوبىرەك شىعارۋعا ءبولىندى دەگەن مالىمەت بار.
قارجى ءمينيسترى ەرۇلان جاماۋبايەۆ ونداي بيۋدجەتتىك كرەديتتەردىڭ بار ەكەنىن راستادى.
ونىڭ ايتۋىنشا، بيۋدجەت قارجىسى الدىمەن كۆازيمەملەكەتتىك كومپانيالارعا بولىنەدى. ولار ءوز كەزەگىندە تاعى قوسىمشا قاراجات تارتىپ، كاسىپكەرلەرگە تومەندەتىلگەن مولشەرلەمەمەن كرەديت بەرە الادى.
«بيۋدجەتتىك كرەديتتەر الدىمەن كۆازيمەملەكەتتىك ۇيىمدارعا بەرىلەدى. ول «بايتەرەك» حولدينگى نەمەسە قازاقستاننىڭ دامۋ بانكى بولۋى مۇمكىن. ولار ءوز كەزەگىندە نارىقتان تاعى كرەديت الادى دا، بارلىق اقشانى ارالاستىرادى. سوسىن ناقتى سەكتورعا جەڭىلدەتىلگەن كرەديت بەرەدى»، - دەدى جاماۋبايەۆ جۋرناليستەرگە بەرگەن سۇحباتىندا.
ءمينيستردىڭ ايتۋىنشا، 0،1 پروسەنت بۇل تىم تومەن مولشەرلەمە ەمەس. سەبەبى بيۋدجەتتىك كرەديتتىڭ نەگىزگى ماقساتى – كاسىپكەرلەرگە قارىزعا بەرىلگەن اقشانىڭ مولشەرلەمەسىن بارىنشا ازايتۋ.
«قازىرگى كەزدە نارىقتاعى تەڭگەمەن بەرىلگەن كرەديتتىڭ مولشەرلەمەسى 15 پروسەنتتەن جوعارى. كاسىپكەرلەر قينالىپ جاتىر. ءبىز ولاردىڭ قولداۋىمىز كەرەك قوي. بانكتەر كرەديت بەرمەي جاتسا، ەكونوميكا قالاي داميدى؟ جۇمىس ورىندارى قالاي اشىلادى؟ ءوندىرىس ورىندارى قالاي جۇمىس ىستەيدى؟ ولارعا اينالما اقشا كەرەك. وسىعان بايلانىستى ءبىز جەڭىلدەتىلگەن پروسەنتپەن الدىمەن كۆازيمەملەكەتتىك سەكتورعا بولەمىز. سونىڭ ارقاسىندا كاسىپكەرلەر تومەن مولشەرلەمەمەن كرەديت الا الادى»، - دەپ اتاپ كورسەتتى جاماۋبايەۆ.