Elimizdiń birqatar óńirinde kún ystyq bolady. Osy oraıda elordadaǵy emhanalardyń dárigerleri ystyq kúnderi densaýlyqqa kútimmen qaraýdyń joldaryn aıtyp, óz usynystarymen bólisti, dep habarlaıdy Almaty-akshamy.kz Inform.kz-ke silteme jsap.
Osy oraıda Nur-Sultan ákimdiginiń resmı saıty qaladaǵy dárigerlerdiń aıtqan pikirlerin kópshilik nazaryna usyndy.
«Ystyq ótip ketkende dene temperatýrasyn retteýge jaýap beretin kompensatorlyq fýnksıalar buzylady. Ystyq kúnderi maıly, tuzdy taǵamdardy jemeý kerek», - dedi №1 qalalyq emhananyń terapevt-dárigeri Alına Borgekova.
Mamannyń aıtýynsha, kún ótken kezde tynys alý qıyndap, dene qyzýy kóteriledi jáne bas aýrady, sondaı-aq keıbir jaǵdaıda adamdar esten tanýy múmkin. Ystyq kúnderi júrek-qan tamyrlary aýrýlary bar adamdar óz densaýlyǵyna kútimmen qaraýy kerek.
«Mundaı kezde tromboz bolýy yqtımal jáne qan qysymy qubylyp turady. Qatty ystyq stenokardıa dertin qozdyrýy múmkin. Sondyqtan júrek-qan tamyrlary aýrýlaryna shaldyqqan adamdar jyldyń osy ýaqytynda densaýlyǵyna kútimmen qaraýy kerek», - deıdi № 4 qalalyq emhananyń kardıology Janat Suńqarbekova.
Dárigerler negizgi terapıa talaptaryn eskerýdi jáne qajet dári-dármekti ózderimen birge alyp júrýge keńes berdi.
«Kún qatty ystyq ýaqytta dalada kóp otyrmaý kerek. Sýdy kóbirek ishken durys bolady. Biraq kofeın men qanty bar sýsyndardy almaǵan abzal», - deıdi J.Suńqarbekova.