Otandyq skrıpkashy Rýslan Talas halyqaralyq baıqaýdyń bas júldesin jeńip aldy.
Óner jarysynda skrıpka, ált, vıolenchel, kontrabas, fortepıano jáne arfa aspaptaryn sheber meńgergen 16 men 35 jas aralyǵyndaǵy daryndar baǵy pen babyn synaǵan bolatyn. Bir jylǵa ulasqan dodadan úzdik shyqqan qazaqstandyq mýzykant endi Berlın fılarmonıasynda, Nú-Iorktegi Karnegı zaly jáne Máskeýdegi Zarádede óner kórsetýge joldama aldy, dep habarlaıdy Almaty-akshamy.kz Qazaqtv.com saıtyna silteme jasap.
Onyń aıtýynsha, baıqaý alǵash ret uıymdastyrylǵanyna qaramastan, básekelestik úlken bolǵan. Al báseke bolmaı, báıge joq.
"Baıqaý týraly óz basym áleýmettik jelilierden kórip bildim, sebebi sonda kóp jarnamalandy. Sondyqtan da qatysýshylar kóp boldy dep oılaımyn. Qatelespesem, ótinish bildirgender sany álemniń 109 elinen 4 myńdaı. Birinshi ret uıymdastyrylǵanyna qaramastan, aýqymdy formatta ótti. Jalpy, baıqaýdyń uzaqtyǵy 1 jylǵa sozyldy. Alǵashqy aınalym aımaqtyq, odan keıin ulttyq, úshinshisi álemdik deńgeıde, al tórtinshi aınalym - fınal Vena qalasyndaǵy «Konserthaýs» zalynda ótti. Men sekildi mýzykant úshin ol zalda óner kórsetý – úlken mártebe", - deıdi skrıpkashy, World Vision – 2022 baıqaýynyń jeńimpazy Rýslan Talas.
Rýslan Talas - óziniń jastyǵyna qaramastan, álemdik skrıpkanyń úzdik ustazdarynan bilim alyp úlgergen mýzykant. Búginde ol Shveısarıadaǵy Lozanna mýzyka akademıasynda magıstratýrada oqyp jatyr. Ónerpazdyń aıtýynsha, skrıpka aspabyna degen mahabbatyn bala kúninde ákesi Musahan Turyntaev oıatqan.
"Ákem meni bala kúnimnen qoldap keledi. Ol - ózi skrıpkashy. Sondyqtan kúndelikti meni ózi oqytatyn. Al negizgi oqýymdy Qazaq Ulttyq mýzyka akademıasynan bastadym. Ol bilim ordasyna rızashylyǵym zor. Onda men 5 jyl oqyp shyqtym. Ary qaraı 12 jasymnan Máskeýdegi Ortalyq mýzyka mektebinde oqýymdy jalǵastyrdym. Al jaqynda Máskeý konservatorıasyn Graf Mýrjanyń synybyn aıaqtadym. Graf Mýrja ol óte tanymal skrpkashy, Qazaqstanǵa óner kórsetýge jıi kelip turady", - deıdi skrıpkashy Rýslan Talas.
Jas daryn otandyq sahnalarda jıi óner kórsetsem, jaı óner kórsetip qoımaı, tanymal álemdik skrıpkashylardyń Qazaqstanǵa kelýine sebepker bolsam deıdi.