Nurdaýlet AQYSH, M.O. Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, jazýshy:
«Bul án burynǵy ánnen ózgerek» degendeı, búgingi Májilis pen máslıhat depýtattarynyń saılaýy burynǵy saılaýlardan sál ózgeshe ekeni qarapaıym saılaýshy retinde barshamyzdyń nazarymyzdy aýdaryp otyr. «Sál ózgeshe» degenimizdiń ózi durys bolmas, ájeptáýir jańalyqtary bar bul saılaý demokratıanyń kelesi asýynyń kórinisi retinde tarıhymyzǵa jazylyp qalar dep úmitttenemiz.
Oǵan sebep birinshiden, 2004 jyldan keıin alǵash ret Májiliske depýtattardyń bir mandat arqyly saılanatyn bolýy. Prezıdenttiń keńesshisi E.Qarınniń aıtýyna qaraǵanda, 98 depýtattyń 29-y Parlamenttegi ornyna osyndaı jolmen qol jetkizýi tıis eken. Odan keıingi másele – kandıdattar buryn tek saıası partıalardan jáne memlekettik emes uıymdardan ǵana usynylatyn bolsa, qazir úmitkerdiń ózin-ózi usyný máselesi zańdy túrde bekitildi. Bul degenimiz – kandıdat bolǵysy keletin el azamatynyń keńistigin keńeıtý degen sóz. Múmkindigi shekteýli jandarǵa jol ashylyp otyr. Osynyń bári saılaý tetiginiń burynǵydan da jetile túskenin bildiredi. Sondyqtan da tirkelgen úmitkerler sany artty.
Bir aýyz sózben aıtqanda, biz ózimizdiń Ádiletti Qazaqstannyń Parlamentin qaıtadan jasaqtaıtyn korpýsty baıyrǵy halyqtyń múddesi turǵysynan tańdap alýymyz kerek. Múmkindiginshe, elge janashyrlyq tanytatyn úmitkerlerdi iriktesek eken. Aınalyp kelgende, bul saılaý elimizdiń bolashaǵyn nyǵaıta túsýge, táýelsizdigin kúsheıtýge jáne halyqtyń ál-aýqatyn jaqsartýǵa yqpal etetin saılaý bolýy kerek.
Men ózim, mine, Naýryzbaı aýdanyndaǵy №504 saılaý ýchaskesine kelip, tańdaýymdy jasap otyrmyn.