Almaty oblysynda Ulttyq ulan basshylyq quramynyń jedel daıyndyǵy ótti.
Almaty oblysy Jetigen kentindegi Ulttyq ulannyń jaýyngerlik jáne ádistemelik daıarlyq ortalyǵynda óńirlik qolbasshylyqtardyń qolbasshylarymen, quramalar men áskerı bólimderdiń komandırlerimen, olardyń tárbıe jáne áleýmettik-quqyqtyq jumystar jónindegi orynbasarlarymen oqý-ádistemelik jıyn ótti, dep habarlaıdy Almaty-akshamy.kz Polisia.kz-ke silteme jasap.
Úsh kún boıy komandırlik býyn ofıserleriniń kásibı daıarlyǵy tekserildi. Jıyn barysynda basshylyq quramnyń atys, dene shynyqtyrý, ádistemelik jáne memlekettik-quqyqtyq daıarlyq boıynsha praktıkalyq daǵdylardy, basshylyq qujattardy bilýi pysyqtaldy. Sondaı-aq áskerlerdi basqarýdy jetildirý boıynsha praktıkalyq daǵdylardy qosa alǵanda, kásibı-laýazymdyq daıarlyqtyń negizgi pánderi boıynsha synaqtar qabyldandy. Ulttyq ulan Bas qolbasshysynyń orynbasary Baýyrjan Ábjanov jıynǵa jetekshilik etip, jedel daıyndyq barysynda ofıserlermen praktıkalyq sabaqtar ótkizýge basa nazar aýdarylǵanyn atap ótti.
Komandırler men olardyń orynbasarlary ártúrli qarýlardan: tapanshalardan, avtomattardan, tegis uńǵyly myltyqtardan, granatometterden jáne pýlemetterden kúndiz-túni qozǵalmaıtyn, oqys paıda bolatyn jáne qozǵalatyn nysandardan atý daǵdylaryn kórsetti. Sondaı-aq, ofıserler sý kedergilerin eńsere otyryp, qıyn jaǵdaılarda jaýyngerlik mashınalardy júrgizý kýrsynan ótti.
Jıyn barysynda ofıserlermen quqyqtyq tártip áskerleriniń jaýyngerlik qyzmetin qamtamasyz etýdiń negizgi túrleri: jaýyngerlik daıarlyq, áskerler qyzmeti jáne áskerı qyzmettiń qaýipsizdigi, moraldyq-psıhologıalyq qamtamasyz etý, qaramaǵynaǵylarmen jeke tárbıe jumysyn júrgizý, áskerı ujymda tártipti buzýdyń aldyn alýǵa baǵyttalǵan is-sharalardy josparlaý boıynsha dárister, oqý-ádistemelik, nusqaýlyq jáne kórsetý sabaqtary ótkizildi. Tótenshe jaǵdaı engizilgen kezde Ulttyq ulannyń áskerı jasaqtary men bólimsheleriniń qoldanylýy kórsetildi.
Jaýyngerlik daıarlyq bas basqarmasynyń bastyǵy Nurlan Muhamedov atap ótkendeı, bul jıyn ofıserlerdiń kúndelikti qyzmetti uıymdastyrý, jeke quramdy basqarý, tehnıka men qarý-jaraqty paıdalaný máselelerindegi bilimi men daǵdylaryn aıtarlyqtaı arttyrýǵa múmkindik berdi.
Sondaı-aq, jedel daıyndyq sheńberinde áskerı bólimderdiń komandırlerimen alǵash ret eldi mekendegi jappaı tártipsizdikterdiń jolyn kesý jáne joıý, batalóndyq taktıkalyq toptyń zańsyz qarýly quramalarynyń qyzmetin izdeý jáne jolyn kesý boıynsha arnaıy operasıa júrgizýdegi jumysy boıynsha shtabtyq jattyǵý ótkizildi. Oqý-ádistemelik jıyndardyń sońǵy kúni QR İshki ister mınıstriniń orynbasary – Ulttyq ulannyń Bas qolbasshysy Erkin Botaqanovtyń tóraǵalyq etýimen Ulttyq ulan áskerı keńesiniń kóshpeli otyrysy ótkizildi, onda 2022 jyldyń birinshi jartyjyldyǵyndaǵy áskerlerdiń qyzmettik-jaýyngerlik qyzmetiniń qorytyndylary shyǵarylyp, Qazaqstan Respýblıkasy Prezıdentiniń talaptaryna sáıkes áskerlerdi odan ári jetildirý jáne damytý máseleleri qaraldy.
Sondaı-aq, Qazaqstan Respýblıkasy İİM alqasynyń kadrlyq jumysty jetildirý, quqyq qorǵaý organdarymen ózara is-qımyl jasaý jáne quqyqtyq tártip zańdylyǵyn nyǵaıtý máseleleri boıynsha sheshimderi jetkizildi.