2024 jylǵy 1 qańtardan bastap Qazaqstanda "Ulttyq qor – balalarǵa" baǵdarlamasy bastalady.
Baǵdarlamaǵa qatysty tolyqqandy aqparatty, ony iske asyrý barysy men sharttaryna baılanysty sizdi mazalaǵan suraqtardyń jaýabyn "Ulttyq qor – balalarǵa" arnaıy paraqshasynan taba alasyz, dep habarlaıdy Almaty-akshamy.kz
Bul baǵdarlamanyń aıasynda Qazaqstannyń ár balasynyń jınaqtaýshy shotyna qarjy aýdarylady, ol qarajatty bolashaqta bilimge nemese baspana satyp alýǵa jumsaýǵa bolady.
Prezıdent qol qoıǵan zańǵa sáıkes, Ulttyq qordyń jyldyq ınvestısıalyq kirisiniń 50%-y Qazaqstan balalarynyń arnaıy jınaq shottaryna 18 jasqa tolǵanǵa deıin aýdarylyp turady. Qarjy Qazaqstan azamaty sanalatyn jáne 18 jasqa tolmaǵan barlyq balaǵa teńdeı bólinedi.
Qarajat BJZQ-daǵy jeke shottarǵa túsedi, shot "Jeke tulǵalar" memlekettik derekter bazasyndaǵy aqparat negizinde ár balaǵa avtomatty túrde ashylady, ıaǵnı ata-analarǵa bankke nemese BJZQ-ǵa arnaıy barýdyń qajeti joq.
Balanyń "Ulttyq qor – balalarǵa" baǵdarlamasyna qatysa alatynyn nemese qatysa almaıtynyn egov.kz portalyndaǵy jeke kabınetten bilýge bolady. Budan bólek, zeınetaqy qorynyń enpf.kz resmı saıtynda turaqty turde málimetter jarıalanyp turady.
Alǵashqy tólemder maqsatty shottarǵa 2024 jyldyń 1 toqsanynda túsedi.
Aqshany birden sheship alýǵa bolmaıdy. Aqsha balalardyń maqsatty jınaq shottarynda bala 18 jasqa tolǵanǵa deıin jınalyp turady. 18 jasqa tolǵan soń aqsha shotta 10 jyl saqtalady. Eger jınaqtalǵan qarajat 28 jasqa deıin paıdalanylmasa, ol alýshynyń zeınetaqy shotyna aýdarylady.
Eger bala 18 jasqa tolǵanǵa deıin elden ketip, azamattyǵyn aýystyratyn bolsa, onda ol tólem talap etý quqyǵynan aıyrylady. Eger bala 18 jasqa tolǵanǵa deıin elden ketkenimen, azamattyǵyn aýystyrmaıtyn bolsa, onda onyń tólem talap etý quqyǵy saqtalady.
Azamattyq zańnamaǵa sáıkes naqty jınaqtalǵan qarajatty muragerlik jolmen berý múmkindigi qarastyrylǵan. Bala áreketke qabiletsiz bolǵan jaǵdaıda, aqshany basqarý quqyǵy ata-anasyna nemese qorǵanshylaryna ótedi.
Bala kámelet jasqa tolǵannan keıin jınaqtalǵan qarjyny eki maqsatta jumsaı alady: turǵyn úı jaǵdaıyn jaqsartýǵa nemese oqý aqysyn tóleýge. Jobaǵa sáıkes, turǵyn úıdi tek Qazaqstan aýmaǵynan ala alady, al oqý aqysyn Qazaqstanda da, sheteldik oqý mekemesinde de tóleı alady.
BJZQ shotynda jınalǵan somany ýákiletti operator arqyly tańdalǵan maqsatqa aýdarýǵa bolady.
Otbasy Bank – osy mańyzdy áleýmettik jobanyń ýákiletti operatorlarynyń biri. Otbasy banktiń enpf-otbasy.kz platformasyn paıdalana otyryp, 2024 jyldyń basynan bastap 18 jastan asqan azamattar alǵan qarajatyn paıdaǵa asyra alady. Baǵdarlamaǵa qatysýshylar jınaqtalǵan qarajatyn myna maqsattarǵa onlaın baǵyttaı alady:
óz qarajatyn paıdalaný múmkindigimen turǵyn úı satyp alý;
ıpotekalyq nesıeni merziminen buryn tolyq nemese ishinara óteý;
ıpotekalyq zaım alý úshin bastapqy jarna engizý, onyń ishinde jóndeý jumystaryn júrgizýge;
Otbasy bankindegi depozıtti toltyrý;
MBBJJ baǵdarlamasy (memlekettik bilim berý jınaqtaý júıesi) aıasynda depozıtti tolyqtyrý;
Qazaqstandaǵy oqý aqysyn tóleý;
basqa elderdegi oqýǵa aqysyn tóleý;
oqýǵa alǵan nesıeni tóleý.