Almatyda konkýrstyq kezeńniń birinshi kezeńi boıynsha Saraptama keńesiniń qorytyndy otyrysy ótti. Ózderińiz biletindeı, bıyl Saraptama keńesiniń quramy jańardy, dep habarlaıdy almaty-akshamy.kz.
Kınotýyndynyń sapasy tikeleı senarıge baılanysty. Sondyqtan Ulttyq kıno ortalyǵynyń basqarma tóraǵasy Qurmanbek Jumaǵalı jıynda keńes múshelerin aldymen jaýapkershilikti tereń sezinýge shaqyrdy.
«Konkýrs kezeńderinde ádil sheshim shyǵarýǵa, ashyq konkýrs ótkizýge atsalysý basty mindetimiz. Sebebi bul sharalar aldaǵy ýaqytta ulttyq múddege, ulttyq ıdeologıaǵa sáıkes keletin jobalardyń artýyna sep bolady», – dedi Qurmanbek Jumaǵalı.
Keńes músheleri de osyny negizge alyp, kún-tún demeı, kelip túsken árbir kınojobaǵa ár kategorıa boıynsha qorytyndy berdi. Óz salasynda jetistikke jetken, aıtary bar mamandar aldymen senarılerdiń ishinen úzdikterin anyqtap, kórermenge oı salar shyǵarmalardy súzgiden ótkizdi. Osylaısha, ekinshi kezeńge, pıchıngke jiberiletin jobalardyń jaıy tarqatyldy.
«Kez kelgen týyndynyń astarynda tereń oı jatpasa, onyń quny kók tıyn. Kıno túsirgen kezde de onyń mazmunyn halqymyzdyń jan-dúnıesimen, kózqarasymen, tárbıesimen qabystyrý qajet. Sarapshylar keńesi de anımasıalyq, oıyn, derekti fılm baǵyttary boıynsha senarılerdi qaraýda osyǵan mańyz berdi. Bul rette kórermenniń talǵamymen sanasyp, kúrdeli taqyryptarǵa barǵan shyǵarmalar kezdeskeni qýantarlyq», – dedi Saraptama keńesiniń tóraǵasy, akter, kınorejısser Dosqan Joljaqsynov.
Ulttyq kıno ortalyǵynyń maqsaty – ashyq ári ádil konkýrs ótkizý. Aldaǵy ýaqytta memlekettik qoldaýǵa úmitker kınojobalardy irikteýdiń birinshi kezeńi boıynsha aqparattar ortalyqtyń resmı saıty men áleýmettik jelilerindegi paraqshalarynda jarıalanatyn bolady.