Halyq sanaǵy Almatyda jáne el boıynsha onlaın-formatta ótkiziledi.
Almaty qalasy boıynsha Statısıka departamentiniń basshysy Aıdar Ábildabekov Óńirlik komýnıkasıalar qyzmeti alańynda sanaq naýqanynyń daıyndyǵy men ótkizilýi týraly egjeı-tegjeı aıtyp berdi, dep habarlaıdy Almaty-akshamy.kz.
Aıdar Ábildabekovtyń aıtýynsha, sanaq – belgili bir ýaqyt kezeńindegi barsha el halqynyń «bir mezette sýretke túsýi» ispetti.
Almaty qalasy boıynsha Statısıka departamentiniń basshysy ótken eki sanaqqa qaraǵanda aldaǵy sanaqtyń «barynsha sıfrlanýyna» nazar aýdardy. Endi popýlásıa týraly málimetterdi jınaý prosesi eki jolmen júzege asyrylady.
Birinshi ádis – mamandandyrylǵan resýrs arqyly sanaq.gov.kz. saıtta respondentter ornalasqan jerine qaramastan ózderine jáne otbasy múshelerine sanaq paraqtaryn toltyra alady. Portal 2021 jyldyń 1 qyrkúıeginen 15 qazanǵa deıin táýligine 24 saǵat boıy qoljetimdi bolady.
Ekinshi ádis — dástúrli úıdi aralaý. Belgilengen merzim boıynsha onlaın-rejımde sanaqtan ótpegen azamattardy aralaıtyn bolady. Suhbat alýshylar qaǵaz paraqtarynyń ornyna elektrondy planshetterdi qoldana alady. Úıdi aralaý 1-30 qazan aralyǵyna josparlanǵan.
Elektrondy saýalnama men úıdi aralaý aıaqtalǵannan keıin ıntervúerler derektiń qamtylýy men durystyǵyn tekserý úshin óz ýchaskelerinde respondentterdiń 10%-yn baqylaý maqsatynda aralaıdy.
«Bul jerde qaı áleýmettik topqa jatatynyna qaramastan, ár adamnyń jaýaby úlken mańyzǵa ıe bolady. 2021 jylǵy QR Ulttyq sanaǵynyń uranyna sáıkes, Qazaqstan úshin árbir adam mańyzdy», – dedi ÓKQ brıfıńi barysynda Aıdar Ábildabekov.
Júrgizilgen halyq sanaǵynyń qorytyndysy boıynsha kórsetkishterdiń keń aýqymy alynady. Jınalǵan aqparat halyq sanyn perspektıvalyq esepteý men eldegi taıaý jyldardaǵy áleýmettik-ekonomıkalyq jaǵdaıdyń sıpattamalary úshin negiz bolady. Sanaq nátıjeleri aýdandar, qalalar men aýyldar bólinisinde halyq sany men onyń quramy týraly naqty derekter alatyn óńirlerge ómirlik qajet bolady. Osy derekter negizinde ýaqtyly basqarýshylyq sheshimder qabyldanady.
«Ár túrli jastaǵy adamdardyń qaıda jáne qansha ýaqyt turatynyn bile otyryp, memlekettik balabaqshalar, mektepter, aýrýhanalar jáne basqa da áleýmettik nysandar salýdy josparlaı alady. Sonymen qatar, sanaq qorytyndysy ekonomıkalyq daǵdarys, indetter adamdardyń ómirine qalaı áser etetinin baǵalaýǵa múmkindik beredi, sondaı-aq ulttyq jobalardyń nátıjelerin shyǵarýǵa kómektesedi», – dep atap ótti spıker.
Sanaq naýqanynyń artyqshylyqtary týraly aıta kele, Aıdar Ábildabekov bıylǵy jyly tek QR azamattary ǵana emes, Qazaqstan Respýblıkasynyń aýmaǵynda turaqty turatyn sheteldikter, azamattyǵy joq adamdar da qaıta jazylatynyn aıtty. Sondaı-aq qyzmettik Memlekettik mindetterin oryndaýǵa baılanysty shetelde júrgen qazaqstandyqtar (dıplomatıalyq korpýs) jáne «Bolashaq» baǵdarlamasy boıynsha oqýda.
Shetelde turaqty turatyn, sondaı-aq shetelge 12 aı jáne odan da kóp merzimge jumysqa nemese oqýǵa ketken Qazaqstan Respýblıkasynyń azamattary, óz memleketteriniń dıplomatıalyq jáne basqa ókildikterinde jumys isteıtin shetel azamattary, sheteldik áskerı qyzmetshiler men olardyń otbasy músheleri qaıta jazylmaıdy.