Bul týraly Senatta ótken Úkimet saǵatynda aýyl sharýashylyǵy vıse-mınıstri Amanǵalı Berdalın málimdedi.
Onyń aıtýynsha, birqatar naqty sharalar oń nátıjege qol jetkizýge yqpal etken, - dep habarlaıdy Aqshamnews.kz.
Atap aıtqanda: veterınarlyq ınfraqurylymdy jańǵyrtý, esep júrgizý úderisterin sıfrlandyrý, otandyq vaksınalar óndirisin keńeıtý jáne materıaldyq-tehnıkalyq bazany nyǵaıtý. Bul baǵyttardyń barlyǵy AÓK damýynyń 2030 jylǵa deıingi tujyrymdamasyna engizilgen.
Naqty málimetter boıynsha, elde 9,1 mln bas iri qara, 23,7 mln bas usaq mal, 4,7 mln jylqy, 302 myń túıe ósiriledi.
Sonymen qatar, 569 myń shoshqa bar.
Baqylaý jáne aldyn alý sharalarynyń kúsheıýi et óndirisin 914 myń tonnaǵa deıin arttyrýǵa, al sıyr jáne qoı eti eksportyn 60,8 myń tonnaǵa jetkizýge múmkindik berdi.
Qazaqstanda Dúnıejúzilik janýarlar densaýlyǵy uıymy (OIE) anyqtaǵan 90-nan astam qaýipti aýrýdyń 23-ine qarsy vaksınasıa júrgizilýde. Jumys ádisterin jetildirý maqsatynda DDSU, FAO jáne OIE sarapshylarynyń qatysýymen jumys toby quryldy.
2024 jyldan bastap salada ımportty almastyrý saıasaty belsendi júzege asyrylýda.
Otandyq vaksınalardyń úlesi 34%-dan 78%-ǵa ósti. Qazir satyp alynatyn 22 vaksınanyń 18-i Qazaqstanda óndiriledi.
Materıaldyq-tehnıkalyq bazany nyǵaıtý aıasynda eki jylda 401 veterınarlyq mekeme salyndy, 892 arnaıy kólik satyp alyndy. Sonymen qatar, 2026–2027 jyldary vetstansıalar, vetpýnktter jáne mal ólekselerin kómý oryndaryn salýǵa 66,2 mlrd teńge qarastyrylǵan.
Laboratorıalyq bazany kúsheıtý maqsatynda 9 suıyqtyq hromatografy satyp alyndy, aldaǵy ýaqytta taǵy 54 qondyrǵymen qamtamasyz etý josparlanǵan. Bul EAEO-nyń azyq-túlik qaýipsizdigi jónindegi talaptarynyń 94%-yn oryndaýǵa múmkindik beredi.
Shyǵys Qazaqstan oblysynda Qytaı standarttary boıynsha 38 zamanaýı qural-jabdyqpen jabdyqtalǵan laboratorıa ashyldy.
ISJ (maldardy esepke alý) júıesi jańǵyrtyldy. Ol janýarlardy jáne ónimdi tolyq qadaǵalaý múmkindigin qamtamasyz etedi. Jalǵan tirkeýdi boldyrmaý, vaksınasıalanǵan janýarlardy dári merzimi bitkenshe soımaý, mal bazary modýli, eksport kezinde karantındi sıfrlyq baqylaý sıaqty fýnksıalar engizildi.
ISZH-Mobile jáne TortTulik mobıldi qosymshalary ázirlendi. Júıe Qarjy mınıstrliginiń QKD, Halyq banki, EAEO servısteri jáne basqa da platformalarmen biriktirilgen.
Qazaqstan transshekaralyq birneshe aýrý boıynsha qaýipsiz el mártebesin saqtap otyr. Olardyń qatarynda aýsyldyń keı óńirleri (ońtústik-shyǵys), jylqynyń afrıkalyq obasy, sondaı-aq shoshqanyń klasıkalyq jáne afrıkalyq obasy, qus tumaýy bar. Soltústik-batys óńirde aýsylǵa qarsy qaýipsiz el mártebesin alý úshin qujattar toptamasy usynyldy.
2025 jylǵa qaraı 16 veterınarlyq sertıfıkat kelisildi, bul ónimdi 42 elge eksporttaýǵa jol ashady. Olardyń ishinde EO, Ulybrıtanıa, Qytaı, Iran, Irak, AQSH jáne Kanada bar.
3 728 qazaqstandyq kásiporyn basqa elderdiń tizilimine engizildi.
«Barlyq sharalar epızootıalyq qaýipsizdikti qamtamasyz etýge, ónim sapasyn arttyrýǵa jáne Qazaqstannyń halyqaralyq naryqtaǵy ustanymyn nyǵaıtýǵa baǵyttalǵan», — dedi Amanǵalı Berdalın.