Qyrkúıektiń basynda josparlanǵan Ahmet Baıtursynulynyń 150 jyldyǵyna arnalǵan mereıtoılyq is-sharalar Áýlıekól aýdanyndaǵy tabıǵı apattyń saldarynan keıinge shegerilgen bolatyn.
Qazir jaǵdaı birshama turaqtalyp, Áýlıekólde baspanasyz qalǵan turǵyndarǵa arnalǵan úı qurylysy qyzý júrip jatyr. Qurylys qazan aıynyń sońyna deıin aıaqtalyp, kún sýytpaı turǵyndarǵa beriletin túri bar. Osyǵan oraı, oblys basshylyǵy Ult ustazynyń mereıtoıyn 1 qazan kúni atap ótýdi josparlap otyr. Merekelik sharalar Ahmet Baıtursynuly jáne Torǵaı aýyldarynda ótedi, dep habarlaıdy Almaty-akshamy.kz.
Oblys ákimdigi jarıalaǵan baǵdarlama boıynsha sharaǵa qatysýshylar aldymen Ahmet Baıtursynulynyń kindik qany tamǵan Sarytúbek qonysyndaǵy Ahańnyń aq kesenesine taǵzym jasaıdy. Osy jerde mýzeı-úıdiń tusaýkeseri ótip, as beriledi.
Odan keıin Torǵaıda qazaq kúresi, at jarysy bastalady. A. Baıtursynuly men M. Dýlatulyna arnalǵan eskertkish ashylyp, qos arystyń atyndaǵy ádebı mýzeıdiń reekspozısıa jumystarynan keıingi tusaýkeseri ótedi. Sondaı-aq N.Ahmetbekov atyndaǵy mádenıet úıinde ǵylymı-praktıkalyq konferensıa ótedi dep josparlanǵan.
Ult ustazynyń 150 jyldyǵyna arnalǵan sharalar «Topjarǵan» stadıonynda ótetin merekelik konsertpen aıaqtalady.