Árıne, Qazaqstan Respýblıkasynyń «Turǵyn úı qurylysyna úlestik qatysý týraly» zańy qurylys kezeńinde páter satyp alatyn azamattardyń quqyqtaryn qorǵaıdy. Úlestik qurylysqa qatysý turǵyndardyń turmys jaǵdaıyn jaqsartý múmkindigine de, bas aýrýyna da aınalýy múmkin. Sondyqtan asyǵys sheshim qabyldamaı, «saqtanǵandy saqtaıdy» degendi umytpaǵan abzal. Sondyqtan úlestik qatysý týraly sheshim qabyldamas buryn, bolashaq kelisimsharttyń barlyq málimetterin zerdeleý qajet, dep habarlaıdy Almaty-akshamy.kz
Almaty qalasy qalalyq josparlaý jáne ýrbanıstıka basqarmasynyń mamandary aldymen qurylys kompanıasyn asa muqıat zertteý jasaý kerektigin alǵa tartady. Zertteýdiń alǵashqy qadamyn qurylys salýshy týraly aqparat jınaýdan bastańyz. Kóp páterli turǵyn úılerdi (KPTÚ) qaıda jáne qanshalyqty sapaly turǵyzdy, qurylysty salý merzimin qanshalyqty saqtaǵanyna basa nazar aýdarǵanyńyz jón. Mindetti túrde sharshy metrdiń baǵasyn anyqtańyz. Usynylǵan baǵanyń qaladaǵy turǵyn úıdiń sharshy metriniń ortasha naryqtyq qunynan edáýir tómen bolýy baıypty zertteýdi qajet etedi. Páterlerdi satý jónindegi ýákiletti kompanıanyń jarǵylyq kapıtalyna júz paıyz qatysý arqyly menshikti jáne (nemese) tartylǵan aqsha esebinen kóp páterli turǵyn úılerdiń turǵyn úı qurylysyna úlestik qatysýdy uıymdastyrý jónindegi qyzmetti júzege asyratyn zańdy tulǵa ǵana qurylys salýshy bola alatynyn este saqtańyz. Ýákiletti kompanıada memleket bergen ýaqytsha óteýli jer paıdalaný (jaldaý) quqyǵymen nemese menshik quqyǵymen tıesili jer ýchaskesi jáne keshendi vedomstvodan tys saraptamanyń oń qorytyndysymen kóppáterli turǵyn úı qurylysy jobasynyń jobalaý-smetalyq qujattamasy bolýy mindetti.
Zańdy nemese jeke tulǵalar turǵyn úı qurylysyna úlestik qatysý úshin shart jasasý maqsatynda kompanıadan aqparat talap etken jaǵdaıda ýákiletti kompanıa memlekettik jáne orys tilderinde aqparat berýge mindetti:
- qurylys salýshynyń jáne ýákiletti kompanıanyń ataýy men zańdy mekenjaıy týraly;
- memlekettik tirkeýdi (qaıta tirkeýdi) rastaıtyn anyqtamany;
- kepildik shartynyń bolýy týraly, Biryńǵaı operatormen jasasqan jáne Biryńǵaı operatordan kepildik alý arqyly turǵyn úı qurylysyna úlestik qatysýdy uıymdastyrý jaǵdaıynda onyń negizgi sharttary;
- ekinshi deńgeıdegi bank jobasyna qatysý arqyly turǵyn úı qurylysyna úlestik qatysýdy uıymdastyrǵan jaǵdaıda úleskerlerden aqsha tartýǵa jergilikti atqarýshy organnyń ruqsatynyń bolýy nemese kóppáterli úıdiń qańqasy salynǵannan keıin úleskerlerdiń aqshasyn tartý tásili týraly;
-qurylys salýshy ótkizgen kóp páterli turǵyn úıler qurylysy jobalary týraly;
- qurylysy boljanatyn kóp páterli turǵyn úı qurylysy obektisi týraly;
- ýákiletti kompanıanyń jer ýchaskesine tıisti quqyǵyn rastaıtyn qujattyń bolýy týraly;
Mundaı qujattardy zertteý úshin arnaıy bilimi bolmasa, osy salada tájirıbesi bar mamandardy tartqan durys. Qurylys salýshyny tańdaý mańyzdy másele ekenin este ustaǵan jón, óıtkeni ol sizge páterdi berýge jaýapty bolady.
Muny muqıat zerttep, kompanıa týraly tolyq aqparatqa qanyq bolǵannan keıin ekinshi qadam – úleskerlik qurylysqa kelisimshart jasaýǵa bolady.
Turǵyn úı qurylysyna úlestik qatysý týraly shart jazbasha túrde jasalady jáne shart Qazaqstan Respýblıkasynyń «Turǵyn úı qurylysyna úlestik qatysý týraly» zańynyń 12-babynda kózdelgen tártippen kóp páterli turǵyn úıdiń ornalasqan jerindegi jergilikti atqarýshy organda esepke qoıǵan kezden bastap jasalǵan bolyp esepteledi. Turǵyn úı qurylysyna úlestik qatysý týraly sharttyń úlgilik nysany Qazaqstan Respýblıkasy Ulttyq ekonomıka mınıstriniń buıryǵymen bekitilgen.
Turǵyn úı qurylysyna úlestik qatysý týraly shart turǵyn úı qurylysyna úlestik qatysýdyń biryńǵaı aqparattyq júıesin paıdalana otyryp, ýákiletti kompanıanyń usynýymen KPTÚ ornalasqan jeri boıynsha jergilikti atqarýshy organda esepke alynýǵa tıis.
Shart EGOV.KZ portalynda esepke qoıylǵannan keıin ǵana qurylys salýshy (ýákiletti kompanıa) sizden aqsha alýǵa quqyly.
Qurylys salýshylar úlestik qurylysqa qatysý shartyn jasasýdyń ornyna kelesi zańsyz áreketterge baratyn jaǵdaılar baryp jatady. Keıbir qurylys salýshy tıisti zańdy qujattarynyń ornyna ınvestısıalaý sharty; birlesken qyzmet týraly shart; úlestik qurylysqa qatysýǵa aldyn ala jasalǵan kelisimsharty; áli salynbaǵan (bolashaqta salynatyn) jyljymaıtyn múliktiń aldyn ala jasalǵan satý-satyp alý kelisimsharty; joǵaryda atalǵan kelisimsharttar boıynsha qoıylatyn talaptar quqyqtaryna jol berý jónindegi kelisimder; páterdi brondaý nemese brondaý sharty jáne t.b. sekildi qujattardy kórsetedi.
Eger qurylys salýshy úlestik qatysý shartynan basqa qandaı da bir shart jasasýdy usynsa, mundaı quqyqtyq qatynastar zańsyz bolyp sanalatynyn jáne zań talaptaryn buza otyryp jasalǵan barlyq mámileler jaramsyz dep tanylatynyn este saqtaǵanyńyz jón.
Basqarma mamandary zań aıasynda turǵyn úı satyp alý ǵana sizdiń quqyqtaryńyz ben múddelerińizdi qorǵaýǵa kepildik beretinin eske salady.
Úleskerlerden aqsha tartýǵa ruqsaty bar turǵyn úı keshenderiniń tizimin myna silteme arqyly kórýge bolady:
https://www.gov.kz/memleket/entities/almaty-uaig/about?lang=ru jáne https://almaty.uaig.kz/
Turǵyn úı qurylysyna úlestik qatysý týraly tolyq aqparatty:
https://www.gov.kz/memleket/entities/almaty-uaig/activities/directions?lang=ru jáne https://almaty.uaig.kz/
Turǵyn úı qurylysyna úlestik qatysý, sondaı-aq «sur sqema boıynsha» páterlerdi satý faktileri boıynsha suraqtaryńyzdy: 8-727-240-80-00, ishki: 221 telefony arqyly bile alasyz. Sonymen qatar, uaigkz@mail.ru elektrondy poshtasy arqyly joldasańyz bolady.
Almaty qalasy qalalyq josparlaý jáne ýrbanıstıka basqarmasy