Aqpan aıynyń 23–26 juldyzynda M.Áýezov atyndaǵy Qazaq ulttyq drama teatrynda «Premeralar aptalyǵy» uıymdastyryldy. 4 kúnge sozylǵan sharada jas rejıserlardyń shyǵarmashylyq eńbegi kóptiń kóńilinen shyǵyp, laıyqty baǵalandy.
İs-sharada Qazaqstan Respýblıkasynyń Mádenıet jáne sport mınıstri Dáýren Abaev bastaǵan qonaqtar qatarynda elimizdiń mádenıet jáne óner salasynyń beldi ókilderi, teatr basshylary, birneshe óner ujymy boı kórsetti. QR Mádenıet jáne sport mınıstrligi atynan yqylas gúli joldandy. Sonymen qatar, teatr ujymyn sátti premerasynyń ótýine oraı Almaty qalasynyń ákimdigi de yqylas gúlimen quttyqtady.
«Alataýdyń bókterinde, teatrymyzdyń tórinde uıymdastyrylyp jatqan is-sharaǵa Qazaqstannyń túkpir-túkpirinen teatr óneriniń maıtalmandary jınaldy. Kórermen nazaryna usynylǵan tyń dúnıelerdiń avtory, rejıserlary, akterlary – jastar. «Bolashaq – jastardyń qolynda» demekshi, jańa tolqynǵa senim bildirip, eńbekterin baǵalap jatqan jaıymyz bar», – deıdi M.Áýezov atyndaǵy Qazaq ulttyq drama teatrynyń dırektory Erkin Jýasbek.
«Premeralar aptalyǵynyń» shymyldyǵyn ashqan «Qan men ter. Aqbala» spektakli joǵary deńgeıde ótti. «Bizdiń traktovkamyzda bul mahabbat úshtigine, adamnyń ishki qundylyǵyna, adamnyń, jalpy qoǵamnyń adam ómirine degen qarym-qatynasyna qurylǵan. Soǵan baılanysty osy spektaklimizdi qoıyp otyrmyz», – dedi «Qan men Ter. Aqbala» spektakliniń rejıseri Árıdash Ospanbaeva. Spektákldegi basty keıipkerlerdiń biri - Aqbalany somdaǵan aktrısa bul rólge bekitilgenine qýanǵanyn, alaıda ishteı qobaljyǵanyn jasyrmady. «Bir qyzyǵy, men bul teatrda qansha ról somdasam, sonyń barlyǵy kóbine sheteldik shyǵarmalar bolyp keledi. Al bul – men somdaǵan úshinshi qazaq qyzynyń obrazy», – dedi aktrısa, «Qurmet» ordeniniń ıegeri Nazgúl Qarabalına.
Aptalyqtyń ekinshi kúni kórermender nazaryna «Qytaıdan jetken sálemdeme» dramasy usynyldy. Qoıylym sonaý keńes zamany ornap, qazaq-qytaı shekarasy qaıta shegelengen ýaqyttardy baıandaıdy. Júreginiń bólshegi shekaranyń arǵy betinde qalyp qoı̆ǵan, saǵynyshtan qusa bolǵan adamdardyń astań-kesteń jan-dúnıesin teatr ujymy sheber jetkize bildi. «Bul – dramatýrgıaǵa alǵash qadam bastyrǵan shyǵarma. Bizdi qoldap, jastyǵymyzǵa qaramaı demeý bildirgen teatr ujymyna alǵysymyzdy bildiremiz», – deıdi dramatýrg Jaqsylyq Muratbek.
Úlken sahnalarǵa laıyqty eki birdeı monodrama bir keshte kishi zalda kórermen qaýymǵa usynyldy. Jansaıa Baýyrjanqyzynyń «Qaıdasyń, mama?», A.Batyrqyzynyń «Beıtanys-tanystar» monospektakli júrekti eljiretti. Taǵdyr aǵyny birde syrtqa tepse, birde baýyryna tartady, birde lapyldaǵan tozaq-jalyn bolyp qamalasa, keıde birtoǵa, buıyǵy sezimge aınalyp, tyǵyryqqa tireıdi, dybyssyz yshqyndyrady. Osyndaı sátterde adam balasynyń qasynan tabylatyn ana ekendigin qoıylym aıqyndaı tústi. «Qoıylymnan erekshe áser alyp qaıttym. Arasynda kózime jas ta keldi. Jastardyń eńbegine tánti boldym. Ata-anamdy saǵynyp, aýylǵa ketkim kelip ketti. Saranyń rólin somdaǵan Záýre Kópjasarovaǵa erekshe alǵysymdy bildiremin», – deıdi kórermen Ásel Rýzıbaıqyzy.
Ekinshi spektákl áıel adamnyń kóńil-kúıiniń qubylmaly tustaryn, birde kóktem, birde kúz bolatynyn aıshyqtaı túsedi. Sizderdi áıel atty sımfonıany tyńdap, onyń taǵdyr qupıasyn birge ashýǵa shaqyramyz. «Áıel adamnyń muńy men zary da ótkinshi jaýyn ispettes, qazir tópep quıyp bergenmen, ile-shala jadyrap shyǵa keledi. Bul – onyń bir kelbeti. Taǵy bir sıpaty – túpsiz tereń tuńǵıyq, sıqyrly da syrly álem. Ol jaqtyń sap-sary sazy da, qońyr áýen boıaýy da ózgeshe», – deıdi Beıtanys jannyń rólin somdaǵan aktrısa Baıan Qajynábıeva.
Erekshe bir aıta ketetin jaıt, spektáklde jalǵyz aktrısa tórt áıeldiń obrazyn somdaıdy.
Premeralar aptalyǵy Dýlat Isabekovtiń «Maqshar túngi mahabbat» mıstıkalyq dramasymen aıaqtaldy. Shyǵarma qazaq dalasyna kelgen qyzyl tóńkerilistiń kóshpendilerdi ǵasyrlar boıy qalyptasqan úırenshikti damý yrǵaǵynan jańyldyrǵanyn, biraz jurttyń shekara asyp, atamekenin tastasa, endi birazy jańa ókimettiń soıylyn soqqanyn beıneledi. Sondaı-aq, qoǵamdaǵy májbúrli ózgeris adamı qundylyqtarǵa salqynyn tıgizgenin kórermenge jetkizdi.