Á.Smaıylov ár oblysta balalarǵa arnalǵan psıhologıalyq qoldaý ortalyqtaryn ashý josparyn ázirleýdi tapsyrdy
QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda turmystyq zorlyq-zombylyqtyń aldyn alý máselesi qaraldy.
Mádenıet jáne aqparat mınıstri Aıda Balaeva atap ótkendeı, Memleket basshysy kámeletke tolmaǵan balalarǵa jasalǵan qastandyqtardy qosa alǵanda, otbasylyq-turmystyq zorlyq-zombylyqtyń kez kelgen túri úshin jazany qatańdatý jáne profılaktıkalyq jumystyń tıimdiligin arttyrýdy tapsyrdy, dep habarlaıdy Almaty-akshamy.kz.
Aldyn alý jáne otbasylarǵa keshendi kómek kórsetý aıasynda óńirlerde 68 qoldaý ortalyǵy jumys isteıdi, onyń 19-y ýaqytsha turatyn oryn usynady. Psıhologıalyq, áleýmettik jáne quqyqtyq kómekpen qatar ondaǵy mamandar otbasy ınstıtýtyn nyǵaıtýǵa jan-jaqty qoldaý kórsetedi. Jalpy jyl basynan beri 100 myńnan astam konsýltasıa berildi. Búgingi tańda osy ortalyqtardyń qyzmetin standarttaý jáne januıalardy turmysy nashar otbasylar qatarynan shyǵarý úshin vedomstvoaralyq ózara is-qımyldy jaqsartý úshin biryńǵaı tujyrymdama jobasy ázirlenip jatyr. 2024 jyldan bastap barlyq ortalyqtyń jumysyna biryńǵaı tásilder engiziletin bolady.
Sonymen qatar mınıstr qazirgi ýaqytta óńirlerde ÚEU daǵdarys ortalyqtarynyń jumysyn qarjylandyrý, jastar arasynda otbasylyq qundylyqtardy nasıhattaý, halyqtyń reprodýktıvti densaýlyǵyn saqtaý jáne az qamtylǵan otbasylarmen profılaktıkalyq jumys sıaqty sharalardy qamtıtyn 156 áleýmettik joba iske asyrylyp jatqanyn atap ótti. Sondaı-aq Mádenıet jáne aqparat mınıstrligi agresorlarmen psıhologıalyq jumys júrgizý boıynsha pılottyq jobany iske qosty, onyń maqsaty – otbasylardy saqtaý jáne turmystyq qylmystar sanyn azaıtý.
Odan bólek 16 qazannan bastap respýblıkada otbasy, áıelder jáne balalardyń quqyqtaryn qorǵaý máseleleri boıynsha «111 – AMANAT» biryńǵaı memlekettik baılanys ortalyǵy iske qosyldy, ol arqyly jedel rejımde quqyqtyq, psıhologıalyq jáne konsýltasıalyq kómek kórsetiledi.
İshki ister mınıstriniń orynbasary Igor Lepeha zańnamalyq deńgeıde qabyldanǵan turmystyq zorlyq-zombylyq úshin jaýapkershilikti qatańdatý jónindegi jańa sharalar týraly aıtyp berdi. Óńirlerdegi jumys týraly Jambyl oblysynyń ákimi Erbol Qarashókeev pen Túrkistan oblysynyń ákimi Darhan Satybaldy baıandama jasady.
Premer-Mınıstr otbasylyq-turmystyq zorlyq-zombylyqtyń aldyn alý memlekettik deńgeıde, sondaı-aq qoǵamnyń tarapynan da keshendi tásilderdi talap etetinin aıtty. Atap aıtqanda, bıyldan bastap turmystyq zorlyq-zombylyq úshin jaýapkershilik kúsheıtildi: Qylmystyq kodekske, Ákimshilik quqyq buzýshylyq týraly kodekske tıisti túzetýler engizildi. Tamyz aıynan bastap óńirlerde tıisti Jol kartasy iske asyrylyp keledi.
«Jalpy qazirdiń ózinde otbasylyq-turmystyq zorlyq-zombylyqqa qatysty qylmystyq quqyq buzýshylyqtyń tómendegeni baıqalady. Degenmen bul máselede jaǵdaı áli de kúrdeli. Jyl basynan beri osyndaı faktiler boıynsha polısıaǵa 74 myńnan astam ótinish kelip túsken. Ákimshilik qamaýǵa alynǵandardyń sany 2 esege kóbeıdi», — dedi Álıhan Smaıylov.
Úkimet basshysy óńirlerde otbasyǵa qoldaý kórsetetin 70-ke jýyq ortalyq qurylǵanyn eske saldy, onda zardap shekkenderge medısınalyq, psıhologıalyq jáne quqyqtyq kómek kórsetiledi. Alaıda bul ortalyqtardyń qatary jetkiliksiz.
«3 jyl ishinde qosymsha osyndaı 97 ortalyq ashý kózdelip otyr. Qazirgi ýaqytta olardyń qyzmetin júıege keltirý jumystary júrip jatyr. Sonymen qatar ortalyqtardy tıisti kadrlarmen qamtamasyz etý máselesin de sheshý qajet», — dedi Premer-Mınıstr.
Sonymen qatar Úkimet basshysy turmystyq zorlyq-zombylyqqa tap bolǵan otbasylarǵa júıeli túrde psıhologıalyq kómek berý jumystary júrgizilmeıtinin aıtty. Bul rette «Jedel jeli» men senim telefondarynyń múmkindigin keńeıtý qajet.
«Jalpy otbasylyq qundylyqtar men adamgershilik qasıetterdi balanyń boıyna jastaıynan qalyptastyrýdyń mańyzy zor. Bizdiń qoǵam otbasylyq agresorlarǵa jáne osyǵan uqsas faktilerdiń kez kelgen túrine múldem tózbeýshilik tanytýy tıis. Zardap shekkenderdi, ásirese balalardy mundaı problemamen betpe-bet qaldyrýǵa bolmaıdy», — dedi Álıhan Smaıylov.
Premer-Mınıstr 2025 jylǵa deıin ár oblysta balalarǵa arnalǵan psıhologıalyq qoldaý ortalyqtaryn ashý josparyn ázirlep, bekitýdi, jańa otbasyn qoldaý ortalyqtaryn, sondaı-aq narkologıalyq mekemelerdi ashýdy qamtamasyz etýdi, psıhoterapevter men narkologtardy daıarlaýǵa arnalǵan memlekettik tapsyrysty ulǵaıtý máselesin pysyqtaýdy, sondaı-aq turmystyq zorlyq-zombylyq úshin jaýapkershilikti qatańdatýǵa qatysty qabyldanǵan túzetýler boıynsha aýqymdy túsindirý jumystaryn uıymdastyrýdy tapsyrdy.