Eńbek mobıldiligi ortalyǵy almatylyqtardy bos oryndar jármeńkesine shaqyrady
20 qazanda Almatyda Eńbek mobıldiligi ortalyǵy jáne Almatynyń mansap ortalyǵynyń uıymdastyrýymen bos oryndar jármeńkesi ótedi. Bul týraly Óńirlik komýnıkasıalar qyzmetiniń alańynda Almaty qalasynyń Eńbek mobıldiligi ortalyǵynyń jumys berýshilerdi qoldaý bóliminiń basshysy Altynaı Júkenova málimdedi, dep habarlaıdy almaty-akshamy.kz.
«Bos oryndar jármeńkesin ótkizýdiń maqsaty jastardy, ózin-ózi jumyspen qamtyǵandardy, jumyssyz azamattardy, sondaı-aq bas bostandyǵynan aıyrý oryndarynan bosatylǵan jáne probasıa qyzmetiniń esebinde turǵan adamdardy jumyspen qamtýǵa járdemdesýdiń belsendi sharalaryna tartý bolyp tabylady. Jármeńkelerdi ótkizý kompanıa ókilderine óz kásiporyndarynyń múmkindikterin tanystyrýǵa múmkindik beredi, jumys izdeýshiler qysqa merzimde personaldy tańdaýǵa múddeli jumys berýshilermen sóılese alady, qyzyqtyratyn bos oryndardy tańdap, tańdalǵan bos orynǵa ótý úshin áńgimelesýden óte alady», - dedi A.Júkenova.
Jyl basynan beri barlyǵy 26 bos oryndar jármeńkesi ótkizildi, oǵan 10553 bos jumys orny bar qalanyń 1298 kásiporny men mekemesi jáne 27182 adam qatysty. Nátıjesinde 500-den astam adam jumysqa ornalastyryldy, 200-ge jýyq adam kásiptik oqytýǵa jiberildi.
«Bir aı buryn jalpyqalalyq jármeńke ótkizilgenin atap óteıik. Jármeńkege 160-qa jýyq jumys berýshi qatysty, olar ónerkásipte, óndiriste, saýda jelilerinde, tamaqtanýda, medısınada, farmasevtıkada, bilim berýde 2500-den astam bos jumys oryndaryn usyndy. 5000 - nan astam izdenýshi qatysyp, keńes aldy, onyń ishinde 1000-nan astam izdenýshi jumysqa ornalasýǵa joldama aldy, 230 adam belsendi jumyspen qamtý sharalarymen qamtyldy», - dep bólisti spıker.
Barlyq týyndaǵan máseleler boıynsha Almaty qalasynyń mansap ortalyǵyna Dostyq dańǵyly 85, «Áleýmettik qyzmetter úıi» mekenjaıy boıynsha habarlasý qajet. Sonymen qatar, qalanyń 8 aýdanynda ortalyq mamandary azamattardy qabyldaý jáne keńes berý jumystaryn júrgizedi.
Biryńǵaı nómiri 310-47-82 boıynsha call-ortalyq jumys isteıdi. Sondaı aq qajetti aqparatty ctm-almaty.kz saıtynan jáne ortalyqtyń áleýmettik jelilerinen tabýǵa bolady.