Tıisti zań jobasy azamattardyń borysh júktemesin azaıtý, áleýmettik shıelenisti jeńildetý, qaryzdar boıynsha tólemderdi yntalandyrý jáne boryshkerlerdi ónimdi ekonomıkalyq qyzmetke qaıtarýdy qamtamasyz etý maqsatynda ázirlendi.
Qarjy mınıstrligi «Azamattardyń tólem qabilettiligin qalpyna keltirý jáne bankrottyǵy týraly» Qazaqstan Respýblıkasy zańynyń jobasy jáne oǵan ilespe zań jobalary boıynsha jumysty aıaqtady. 21 zańnamalyq aktige (8 kodeks pen 13 zańǵa) ózgerister men tolyqtyrýlar engizý kózdelip otyr, dep habarlaıdy Almaty-akshamy.kz Primeminister.kz-ke silteme jasap.
Zań jobalaryn talqylaý barysynda jumys tobynyń 10 otyrysy ótti, 100-den astam usynys pen eskertýler qaraldy, «elektrondyq úkimet» platformasy arqyly qoıylǵan 276 suraqqa jaýap berildi. Usynystar negizinde zań jobalaryna ózgerister engizildi, onyń ishinde: bankrottyq týraly ótinishterdi berý rásimi jeńildetildi, áleýmettik jaǵynan az qamtylǵan adamdarǵa memlekettik kómek qarastyryldy, bitimgershilik kelisim jasasý múmkindigi engizildi, bankrottardyń qarjylyq saýattylyqty arttyrý kýrstarynan mindetti túrde ótýi, t.b. engizildi.
Keńes qorytyndysy boıynsha QR Premer-Mınıstri Álıhan Smaıylov ýákiletti memlekettik organdarǵa kelisilmegen máseleler boıynsha biryńǵaı ustanymdar ázirleýdi jáne otandyq zańnamada qarastyrylǵan barlyq saraptamalardy júrgizýdi tapsyrdy.