Úkimet otyrysynda ınflásıanyń aldyn alý sharalary pysyqtaldy
QR Premer-Mınıstri Asqar Mamınniń tóraǵalyǵymen ótken Úkimet otyrysynda ınflásıaǵa qarsy áreket etý jónindegi sharalar kesheni qaraldy, dep habarlaıdy Almaty-akshamy.kz Rrimeminister.kz-ke silteme jasap.
Elimizdiń Ulttyq ekonomıka mınıstri Áset Erǵalıev, Ulttyq bank tóraǵasy Erbolat Dosaev, Básekelestikti qorǵaý jáne damytý agenttiginiń tóraǵasy Serik Jumanǵarın, aýyl sharýashylyǵy birinshi vıse-mınıstri Aıdarbek Saparov, Saýda jáne ıntegrasıa vıse-mınıstri Erjan Qazanbaev baıandama jasady. Memleket basshysy Qasym-Jomart Toqaevtyń Joldaýda ınflásıanyń ósýine jol bermeý boıynsha alǵa qoıǵan mindetin oryndaý maqsatynda Úkimet qysqa merzimdi jáne orta merzimdi perspektıvaǵa arnalǵan ınflásıaǵa qarsy áreket etý jónindegi sharalar keshenin ázirledi.
Azyq-túlik ınflásıasyn tejeý jónindegi jedel sharalar aıasynda sektorda qun belgileýdiń búkil tizbeginde baǵany turaqtandyrý boıynsha naqty sharalar qabyldanady. Áleýmettik mańyzy bar azyq-túlik satyp alynyp, «Azyq-túlik kelisim shart korporasıasy» UK» AQ-nyń aýyl sharýashylyǵy ónimderin qaıta óńdeýshiler úshin shıkizattyń turaqty jáne boljamdy baǵalaryn qamtamasyz etýdegi róli keńeıtiledi. Óndirýshilerge jeńildikpen kredıt jáne sýbsıdıa berý mehanızmderi keńeıtilip, aýyl sharýashylyǵy ónimderin saqtaý ınfraqurylymyn salý úshin sýbsıdıalaý normalary ulǵaıtylady. Áleýmettik mańyzy bar azyq-túlik taýarlaryn satýshylar úshin jaldaý aqysy tómendetiledi.
Eldegi Óndirýshilerdiń biryńǵaı tizilimin jasaý jáne baǵany monıtorıńteý jónindegi taldamalyq platformany iske qosý óńirlerde ınflásıanyń kúrt ósý faktilerine dereý áreket etýge múmkindik beredi. Azyq-túlikten basqa taýarlarǵa ınflásıa deńgeıin tejeý jónindegi sharalar aıasynda qajet bolsa, tapshylyq oryn alyp otyrǵan nemese ishki naryqta baǵasy ósken shıkizat pen materıaldardy syrtqa shyǵarýǵa shekteý engizý kózdeledi. Medısınalyq qyzmetterdiń keshendi tarıfterin jáne birqatar medısınalyq taýardyń shekti baǵasyn aldyn ala bekitý qamtamasyz etiledi.
Inflásıa ımportynyń joǵary deńgeıi bar óndiristerdi ulǵaıtý jóninde naqty sharalar qabyldanady, onyń ishinde qurylys materıaldary men jeńil ónerkásip ónimderi de bar. Aqsha-nesıe saıasatynyń aıasynda ınflásıaǵa qarsy sharalardy iske asyrýǵa, onyń ishinde ekonomıkadaǵy ótimdilik kólemine baqylaýdy kúsheıtý jolymen iske asyrýǵa nazar aýdarylatyn bolady.
«Bul sharalardyń bári osy jyldyń aıaǵyna deıin azyq-túlikten basqa taýarlar men aqyly qyzmetterdiń baǵasyn jedel túrde turaqtandyryp, ınflásıanyń jalpy deńgeıin baqylaýǵa múmkindik beredi», - dedi A. Mamın.
Úkimet basshysy memlekettik organdar men uıymdarǵa, jergilikti atqarýshy organdarǵa kózdelgen sharalardy oryndaýǵa dereý kirisýdi, Ulttyq ekonomıka mınıstrligine olardyń iske asyrylý barysyna monıtorıń jasaýdy tapsyrdy.