Almaty qalasy polısıa departamentiniń jyldam qımyldaıtyn arnaıy jasaǵynyń qyzmetkeri qyzmetten tys ýaqytta qaladaǵy kópqabatty turǵyn úılerdiń birinen quramynda esirtki zattary bar ósimdikterdi zańsyz ósirý deregin anyqtady, - habarlaıdy Aqshamnews.kz.
Túsken aqparatty tekserý barysynda páterden qoldan jasalǵan fıtozerthananyń jumys istep turǵanyn aıǵaqtaıtyn belgiler shyqty. Oqıǵa ornynda qarsylyq kórsetýge árekettengen eki er adam ustaldy.
JQAJ qyzmetkeri olardy jedel túrde toqtatyp, polısıa narádyn shaqyrdy. Oqıǵa ornyna Almaty qalasy Naýryzbaı aýdany polısıa basqarmasynyń tergeý-jedel toby kelip, derekti tirkedi, arnaıy jabdyqtar men ósimdikterdi tárkiledi, sondaı-aq sotqa deıingi tergep-tekserý jumystaryn bastady.
- Arnaıy bólimshe qyzmetkerleri úshin qyzmet jumys ýaqytymen shektelmeıdi. Kásibı daıarlyq pen jaýapkershilik kez kelgen jaǵdaıda, onyń ishinde qyzmetten tys ýaqytta da durys sheshim qabyldap, saýatty áreket etýge múmkindik beredi. Bul oqıǵa – polısıanyń zań men tártip kúzetinde táýlik boıy turǵanynyń aıqyn dáleli. Esirtkiniń zańsyz aınalymyna qatysty kez kelgen fakti anyqtalyp, ýaqyty men mán-jaıyna qaramastan qatań túrde joly kesiledi, – dedi Almaty qalasy polısıa departamentiniń jedel qımyldaıtyn arnaıy jasaǵynyń komandıri Azamat Isergýjın.