Megapolıste Halyqaralyq múgedekter kúnine oraı «Júrekten júrekke» atty aýqymdy qalalyq ınklúzıvti shyǵarmashylyq festıvál ótti. Erekshe bilim berý qajettiligi bar balalardy, jastardy jáne múmkindigi shekteýli jandardy qoldaýǵa baǵyttalǵan bul bastama mádenı sharadan góri, Almatynyń teńdik pen ınklúzıa qundylyqtaryn resmı túrde aıqyndaıtyn qoǵamdyq manıfeske aınaldy.
Festıvál qoǵamdy biriktiretin ashyq alań retinde uıymdastyryldy. Munda ár bala men jas óz qabiletin erkin kórsetip, talantyn tanytýǵa múmkindik aldy. Sharanyń ıdeıasy men formaty Qazaqstan Respýblıkasynyń Konstıtýsıasyna, «Balanyń quqyqtary týraly» jáne «Múgedekterdi áleýmettik qorǵaý týraly» zańdarǵa tolyq sáıkes ázirlengen. Uıymdastyrýshylardyń aıtýynsha, basty maqsat – Almatyny ınklúzıvti mádenıettiń ortalyǵyna aınaldyrý.
Festıváldiń fılosofıasy qarapaıym ári tereń: «Ár adam – biregeı. Ár adam – teń». Bul – aıaýshylyq emes, qabyldaý men qoldaýǵa negizdelgen kózqaras. «Júrekten júrekke» arqyly qala ınklúzıany áleýmettik saıasattyń bir baǵyty ǵana emes, mádenı kodtyń ajyramas bóligi retinde qabyldaýǵa qadam jasady. Osylaısha Almaty Ortalyq Azıadaǵy eń iri ınklúzıvti mádenı bastamalardyń birin júzege asyrdy.
İs-sharany Almaty qalasynyń ákimdigi men qalalyq jumyspen qamtý jáne áleýmettik baǵdarlamalar basqarmasy, sondaı-aq «Erekshe balalardyń ata-analar odaǵy» respýblıkalyq qoǵamdyq birlestigi birlesip uıymdastyrdy. Festıválge demeýshiler, kásipkerler, blogerler jáne qoǵam belsendileri de qoldaý kórsetti.
«Erekshe balalardyń ata-analar odaǵy» RQB basshysy, erekshe balanyń anasy Raýan Saǵadıeva festıváldiń mánin bylaı túsindirdi:
«Bizdiń maqsat – balalardy dıagnozyna nemese jasyna qaraı bólmeı, barlyǵyna teń múmkindik berý. Biz ınklúzıany bilim, densaýlyq, áleýmettik qoldaý, psıhologıalyq jáne quqyqtyq kómek arqyly damytamyz. Bul festıvál arqyly qoǵamǵa bir ǵana oıdy jetkizgimiz keledi: bizdiń balalar ádemi, talantty, múgedektik – qorqynyshty nárse emes. Ár balanyń artynda júrek, jan, ata-ana tur. Bizdi bólektemeı, qosyńyzdar», – dedi ol.
Almatyda alǵash ret ótken festıválge 25 ótinim túsip, densaýlyq jaǵdaıyna baılanysty 17 qatysýshy óner kórsetti. Uıymdastyrýshylardyń sheshimimen bul joly barlyq qatysýshy jeńimpaz dep tanylyp, syıaqylar tabystaldy. Aldaǵy jyldan bastap festıváldi respýblıkalyq deńgeıge shyǵarý josparlanyp otyr.
Festıválge qatysýshylardyń biri, ánshi ári aqyn Asylbek Qýanyshqalıev sharanyń atmosferasyna joǵary baǵa berdi.
«Búgingi festıválge qatysqan ár jan – jeńimpaz. Almaty qalasyna qonys aýdarǵannan beri baıqaǵanym, bul qalada múmkindigi shekteýli jandarǵa erekshe kóńil bólinedi. Qoldaý naqty ispen dáleldenip otyr. Osyndaı alańdar bizge ómirge degen qushtarlyq pen senim syılaıdy», – dedi ol.
«Júrekten júrekke» festıvali Almatyda ınklúzıanyń tek uran emes, naqty áreket ekenin kórsetti. Bul – talantty taný, teń múmkindikti moıyndaý jáne júrekten júrekke jol tabatyn mádenı dıalogtyń bastaýy.