Kardıologıa jáne ishki aýrýlar ǵylymı-zertteý ınstıtýtynda «Mıtral jetkiliksizdigin transkateterlik emdeýdiń zamanaýı tásilderi. Dragonfly™» taqyrybynda master-klass uıymdastyryldy.
İs-shara aıasynda ınstıtýttyń ıntervensıalyq kardıologtary halyqaralyq sarapshylarmen birlesip, joǵary hırýrgıalyq qaýipi bar 71 jastaǵy pasıentke sátti operasıa jasady. Pasıentte aıqyn mıtral jetkiliksizdigimen qatar, kerneý stenokardıasy, I dárejeli arterıalyq gıpertonıa, ınsýlınge táýeldi qant dıabeti jáne dıabettik polınevropatıa sıaqty qosalqy aýrýlar bolǵan.
Buǵan deıin pasıent mıokard ınfarktisin ótkergen. Ony júrek soǵysynyń jıileýi, entigý, aıaqtyń isinýi, jalpy álsizdik pen tez sharshaý mazalaǵan.
Operasıa mıtral qaqpaqshany transkateterlik qalpyna keltirýge arnalǵan Dragonfly™ ınovasıalyq júıesin qoldaný arqyly júrgizildi. Bul — Qytaıda ázirlengen jáne TEER (Transcatheter Edge-to-Edge Repair) tehnologıasyna negizdelgen alǵashqy qurylǵy. Atalǵan ádis mıtral jetkiliksizdigin emdeýdiń eń klınıkalyq turǵyda zerttelgen jáne halyqaralyq deńgeıde moıyndalǵan ıntervensıalyq tásilderiniń biri sanalady.
Kardıologıa jáne ishki aýrýlar ǴZI basqarma tóraǵasy Rústem Tóleýtaevtyń aıtýynsha, bul tehnologıa «ashyq» operasıaǵa qarsy kórsetilimi bar, qosalqy aýrýlary kóp pasıentterdi emdeýde jetekshi eýropalyq klınıkalarda óziniń tıimdiligin dáleldegen.
Rentgenendovaskýlárlyq operasıalyq bloktyń meńgerýshisi Alekseı Kolesnıkov TEER terapıasy joǵary hırýrgıalyq qaýipi bar pasıentterde mıtral qaqpaqshasynyń qyzmetin qalpyna keltirýdiń halyqaralyq standarty ekenin atap ótti.
Dragonfly™ júıesin qoldaný Qazaqstanda ıntervensıalyq kardıologıany damytýǵa jáne mıtral jetkiliksizdigin emdeýdiń eń az ınvazıvti ádisteriniń qoljetimdiligin arttyrýǵa jańa múmkindikter ashady.
Operasıa sátti ótti. Qazirgi tańda pasıenttiń jaǵdaıy turaqty, ózin jaqsy sezinedi.