Búginde barlyq saıabaqtar men 8 skver jóndelgen
Óńirlik komýnıkasıalar qyzmeti alańynda Túrksib aýdanynyń ákimi Baqytjan Aqjarov «Búdjetke qatysý» jobasy aıasynda jyl sońyna deıin jergilikti turǵyndardyń 32 usynysy iske asyrylatynyn aıtty, dep habarlaıdy Almaty-akshamy.kz.
Aqjarovtyń aıtýynsha, olardyń qatarynda sport, balalar oıyn alańdaryn salý, aýmaqty kógaldandyrý, qoǵamdyq paıdalaný oryndaryn jóndeý jáne jaryqtandyrý, qatqyl turmystyq qaldyqtardy jınaý úshin tereńdetilgen konteınerlik alańdardy ornatý bar. Bul ózgerister Túrksib aýdanynyń barlyq aýmaǵynda júzege asady dep boljanýda.
Ákimdiktiń málimetinshe, aýdanda úsh saıabaq pen 12 skver ornalasqan, búginde barlyq saıabaqtar men 8 skver jóndelgen. Mysaly, bıylǵy jyly «Seıfýllın» saıabaǵynyń aǵymdaǵy jóndeý jumystary aıaqtaldy, onda balalarǵa arnalǵan SHSN-dar men basketbol alańy bar, syrtqy jaryqtandyrý jelileri aýystyryldy. Ótken jyly Saýranbaev kóshesindegi jaıaý júrginshiler aımaǵy kúrdeli jóndeýden ótti.
«Altaı-1 shaǵyn aýdanynda turǵyndardyń bos ýaqytyn ótkizýleri úshin oıyn jáne sport alańdary, syrtqy jaryqtandyrý jelileri, shaǵyn sáýlet nysandary, aýmaqty kógaldandyrý bar jaıaý júrginshiler aımaǵy abattandyrylady. Sondaı-aq, Maılın kóshesindegi skverdi bólý boıynsha jumystar júrgizilýde jáne Moldaǵalıev kóshesi men Chehov kóshesiniń jaıaý júrginshiler aımaǵyn kúrdeli jóndeý boıynsha 2022 jylǵa arnalǵan joba ázirlenýde», - dep tolyqtyrdy Baqytjan Aqjarov.
Búgin «Teksaı-Jarbulaq» saıabaǵy men Maıak toǵaıyn abattandyrý jáne kógaldandyrý jalǵasýda. Eki skverdi – «Balalar shyǵarmashylyq úıi» jáne «Áýejaı skverin» jóndeý boıynsha joba ázirlendi.
Kógaldandyrý máselesi aýdan úshin ózekti bolyp qalýda. Búginde aýdannyń jasyl qory qalalyq qordyń 20%-yn quraıdy. Aýdanda 424 myń jasyl jelek bar.
Bıyl 50 aǵashty sanıtarlyq kesý, 4 100 aǵashty formalyq kesý, 500 túp kóshet otyrǵyzý aıaqtaldy. 13 208 aǵashty sanıtarlyq kesý jalǵasýda.
«Bıyl aýdan turǵyndarymen birge kóktemgi jáne kúzgi kezeńde 2 189 kóshet otyrǵyzyldy. Sońǵy eki jylda barlyǵy 74 myń aǵash otyrǵyzyldy», - dedi Baqytjan Aqjarov.
2021 jyly aýdanda 9,9 myń sh.m. gúl otyrǵyzyldy, 2022 jyly 11 myń sh.m. gúl otyrǵyzý josparlanǵan.