Oqýshy oryndarynyń tapshylyǵy – 1 690
Túrksib aýdanynyń ákimi Baqytjan Aqjarov Óńirlik komýnıkasıalar qyzmeti alańynda mektepke deıingi mekemelerdiń máselesin sheshýge ýáde berdi, sondaı-aq mektepter men dárigerlik ambýlatorıalar salý josparlary týraly aıtty, dep habarlaıdy Almaty-akshamy.kz.
Baqytjan Aqjarovtyń aıtýynsha, aýdanda 30 mektep bar, olardyń úsheýi ǵana jeke menshik. Barlyǵy 33 442 oqýshy, oqýshy oryndarynyń tapshylyǵy – 1 690.
Bul máseleni sheshý úshin № 170 mektepke 280 oryndy qosymsha qurylys salyndy. Bıyl nysan paıdalanýǵa berildi. Sonymen qatar,Seıfýllın dańǵyly, 50 mekenjaıda ornalasqan 590 oqýshyǵa arnalǵan jeke qarjy lıseıi salyndy.
2022 jyldyń qarasha aıynda Qaırat shaǵyn aýdanynda 1500 oryndy úlken mektep salý josparlanýda. Sonymen qatar, Saýranbaev kóshesinde ornalasqan № 59 mektep-gımnazıasynyń jańa ǵımaratynyń qurylysy josparlanǵan.
Baqytjan Aqjarovtyń aıtýynsha, mektepke deıingi mekemelermen de másele sheshiledi. Aýdanda 96 balabaqsha jetispeıdi, sondyqtan Jas Qanat shaǵyn aýdanynda 280 oryndy balabaqshanyń qurylysy bastaldy. Ǵımarat 2022 jyldyń birinshi toqsanynda tapsyrylady. Sondaı-aq 331 orynǵa 7 jekemenshik mektepke deıingi balalar uıymy ashyldy. Jas Qanat-2 shaǵyn aýdanynda 260 oryndyq taǵy bir memlekettik balabaqsha salý jobasy ázirlenýde.
Aýdan ákimi 100 oryndy №86 balabaqsha men múmkindigi shekteýli balalarǵa arnalǵan Almaty qalalyq ońaltý ortalyǵynyń ǵımarattaryn jóndeý jáne seısmıkalyq kúsheıtý jumystary týraly da aıtty.
Aýdanda medısınalyq ınfraqurylymdy keńeıtý úshin kelesi obektilerdiń qurylysyna JSQ ázirlenýde: Qaırat shaǵyn aýdanynda bir aýysymda 340 adam qabyldaıtyn emhana, Nurshashqan, Álmerek, RV-90 shaǵyn aýdandarynda jáne Aıbasov kóshesinde dárigerlik ambýlatorıalar. Olardyń qurylysy 2022 jylǵa josparlanǵan. №20 qalalyq emhananyń dárigerlik ambýlatorıasynyń jalǵa alynǵan ǵımaratyn satyp alý máselesi qarastyrylýda.