Qutqarýshylardyń ózderine qaýip tóndi.
Senbi kúngi keshki málimet boıynsha, Túrkıada jer silkinisinen qaza tapqandar sany 24 myńnan asty. Tiri qalǵandardy izdestirý jumystary jalǵasyp jatyr, biraq nemis jáne avstrıalyq qutqarýshylar tonaý men atys saldarynan apat aýmaǵynda jumysyn toqtatty. Bul týraly Almaty-akshamy.kz Qazaqparatqa silteme jasap habarlaıdy.
Qutqarýshylardyń ózderine qaýip tóndi. Eki nemis uıymy – Germanıanyń halyqaralyq izdestirý jáne qutqarý qyzmeti (ISAR) jáne Germanıanyń tehnıkalyq kómek kórsetý jónindegi federaldyq agenttigi (THW), odan keıin taǵy birneshe uıym Túrkıanyń ońtústiginde qutqarý jumystaryn toqtatty.
«Ártúrli toptar arasyndaǵy qaqtyǵys týraly habarlar kóbeıip keledi, sonymen qatar oq atqan dybystar da estiledi», - dep túsindirdi ISAR ókili Shtefan Haıne.
ISAR jáne THW Túrkıanyń Azamattyq qorǵanys qyzmeti Túrkıa tótenshe jaǵdaılar basqarmasy (AFAD) qaýip seıilgenin habarlaǵan jaǵdaıda, izdestirý jumysyna qaıta kirisýge daıyn ekenin jetkizdi.
Buǵan deıin Avstrıa áskerıleri Túrkıadaǵy qutqarý jumysyn toqtatqan bolatyn. Olardyń ókiliniń aıtýynsha, keıbir toptar arasyndaǵy atys-shabys pen maroderlik qutqarýshylarǵa úlken qaýip týdyryp otyr.
Túrik bıligi qaqtyǵystar nemese atys týraly habarlap jatqan joq, biraq el prezıdenti Rejep Taııp Erdoǵan senbi kúni jer silkinisinen zardap shekken aımaqta tonaý faktileri bar ekenin moıyndap, bılik shara qoldanatynyna sendirdi.