Japonıada týrıs tartýdyń tyń ári tıimdi ádisi júzege asa bastady.
Saıahattaýǵa kelgen qonaqtardy rıksha arbasymen er azamattar emes, qyz-kelinshekter tasıdy. Sondaı-aq olar jolaýshylarǵa eldiń tarıhy, salty men mádenıetinen jańa málimet berip, qos mindetti qatar atqaryp júr, dep habarlasty Almaty-akshamy.kz 24.kz-ke silteme jasap.
Rıksha - Ońtústik-SHyǵys Azıadaǵy Japonıada keń taralǵan kólik. Salmaǵy 250 kelige jetetin arba negizinen er-azamattarǵa laıyqtap jasalǵan. Biraq naryqtaǵy suranys júrgizýshi qyz-kelinshekterdiń de qataryn arttyrdy.
Rúta Nısıo, «Rıksha júrgizýshiler birlestiginiń» prezıdenti:
«Bizdiń kompanıadaǵy 90 rıkshanyń 25-in áıelder júrgizedi. Náziktigine qaramastan arýlar aýyr rıkshany tizgindep júr. Mingen jolaýshylarǵa Tokıonyń tamasha jerlerin kórsetip, tanystyryp, mádenıetimizdi ulyqtaıdy. Sondyqtan keleshekte áıelderge rıksha júrgizýdi jeńildetetin qolaıly jaǵdaı qalyptastyryp, qataryn kóbeıtsem be deımin».
Keıbir qyzdar tipti ulttyq kıim kıip alǵan. Osylaısha olar qyzmet kórsetý sapasyn arttyramyz deıdi.
Iýka Akımoto, rıksha júrgizýshisi:
«Alǵashynda bári maǵan tańyrqaı qaraıtyn. Keıde jumys barysynda arbany qulatyp alǵan sátter de boldy. Qoǵamda rıksha tizgindeý tek erlerge ǵana tán degen pikir qalyptasqan. Menińshe, kez kelgen jumys er-áıel dep talǵamaıdy. Jumysym ózime unaıdy. Jolaýshylarymdy únemi jymıa qarsy alyp, kúlimdep shyǵaryp salamyn».
Rıksha júrgizýshisine talap joǵary. Qarbalas kezinde keptelisten jyldam shyǵyp, jolaýshyny dittegen jerine jetkize bilý qajet.
Asly Túrkseven, týrıs:
- Bastapqyda bul qyzdyń bizdi apara alatynyna senimsiz boldym. Biraq áıel bolǵanyna qaramastan jumysyn tyńǵylyqty isteıdi eken. Qyzmetine rızamyn.
Rıksha júrgizetin arýlar kóptep adam tartý úshin áleýmettik jelini belsene paıdalanady. Ǵalamtor arqyly izdep tapqan sheteldikter arba tizginshilerine aldyn ala kezekke turady. Osylaısha kúnkóris qamyn kúıttegen qyz-kelinshekter eldiń týrızm salasyn damytyp ári eńbektiń ozyq úlgisin kórsetip júr.