Almaty marafony - Ortalyq Azıadaǵy eń iri jarys, bıyl 1 qazanda on ekinshi ret ótedi. Almaty marafony AIMS Halyqaralyq jarystar men júgirýler qaýymdastyǵyna kiredi, marafon trassasy World Athletics standartyna sáıkes sertıfıkattalǵan. Bıyl jarysqa álemniń túkpir-túkpirinen kelgen 15 000 sportshy qatysady, dep habarlaıdy almaty-akshamy.kz
Marafonǵa 15 jastan asqan tilek bildirýshiler 42,2 shaqyrym, 21,1 shaqyrym, 10 shaqyrym, 10 shaqyrym skandınavıalyq júriske jáne Ekıden komandalyq estafetasyna qatysýǵa bolady. Sóre men máre Respýblıka alańynda josparlanǵan. Márege jetken qatysýshylar máreshiniń estelik medalin alady. Sonymen qatar, erler men áıelder arasyndaǵy jas sanattaryndaǵy úzdik úshtik medalmen, gramotamen jáne aqshalaı syılyqpen marapattalady. 21,1 shaqyrym jáne 42,2 shaqyrym absolútti jeńimpazdarda aqshalaı syılyq beriledi.
Dástúrli is-shara aıaqtalǵannan keıin jınalǵan qarajattyń bir bóligi qaıyrymdylyq jobalardy qoldaýǵa jiberiledi. 2022 jyly Qaskeleń men Talǵardaǵy múgedektigi bar balalarǵa arnalǵan eki mektep-ınternatqa, «Solnyshko» balalar úıi men «Rehab Team» ońaltý ortalyǵyna sport nysandaryn salyp, qajetti jabdyqtardy satyp alýǵa 45 500 000 teńge bólindi. Buǵan qosa, «Odınnadsat drýzeı Maksıma» komandasyna «Flying Start racing Wheelchair» on jarys arbasy tabystaldy.
Almaty marafonynyń uıymdastyrýshylary: «Birinshi bolý – batyldyq» korporatıvtik qory, «World Class Almaty» fıtnes-klýby, Akademık Sh.Esenov atyndaǵy ǵylymı-bilim berý qory jáne Almaty qalasy ákimdiginiń qoldaýymen #Senińjańaqyryń mýltısporttyq Youtube-arnasy.
Marafonǵa qatysý úshin almaty-marathon.kz saıtyna tirkelip, qatysý aqysyn tóleý qajet. Qazirgi ýaqytta 21,1 km, 42,2 km qashyqtyqqa, skandınavıalyq júris pen Ekıden estafetasyne tirkelýge bolady.
Marafondy ótkizýge baılanysty 1 qazanda saǵat 7:00 - den 13: 30-ǵa deıin jarys ótetin jerlerde joldarda kólik qozǵalysy ishinara jabylatyn bolady. Jol qıylystary týraly ózekti aqparatty Almaty joly Telegram-kanalynan https://t.me/AlmatyJoly jáne qalanyń resmı Instagram paraqshasynda https://www.instagram.com/akimat_almaty/) kórýge bolady.