Memleket basshysy Qasym-Jomart Toqaev Qarjy monıtorıńi agenttiginde jıyn ótkizdi, - dep habarlaıdy aqshamnews.kz tilshisi.
Prezıdent sala mamandaryn kásibı merekesimen quttyqtap, osydan bes jyl buryn, el ishinde aýqymdy ózgerister qolǵa alynyp jatqan tarıhı kezeńde qurylǵan Qarjylyq monıtorıń agenttigi ózine júktelgen jaýapkershilik pen mindetti abyroımen oryndap kele jatqanyna nazar aýdardy.
"Qarjylyq barlaý qyzmetkerlerinen naǵyz jaýapkershilik pen jasampazdyq turǵysynan qaraıtyn otanshyldyqty talap etemin. Mundaı qasıetke ıe adamdar jemqorlyqtan, ashkózdikten, saýatsyzdyqtan ada bolýǵa tıis. Saýatsyz, ásirese ashkóz, kórseqyzar, jemqorlyqqa beıim adam eshqashan patrıot bola almaıdy. Árıne, ol ózin patrıot sanaýy, alaýlatyp, jalaýlatyp sóıleýi múmkin. Alaıda ol patrıot emes jáne ony bári biledi. Sondyqtan bul arada otanshyldyqty durys túsine bilgenimiz abzal. Men bul jóninde Qyzylordada ótken Ulttyq quryltaı otyrysynda aıttym. Qazirgi ýaqytta jańa Konstıtýsıanyń mazmunyn qarap jatyrmyz. Biz osy ózgerister aıasynda patrıotızm týraly uǵymdy naqtylap, jaýapkershilikke ári jasampazdyqqa qurylǵan otanshyldyqty aıqyndaı alamyz dep oılaımyn. Naǵyz patrıot barlyq jerde, ol Qarjylyq monıtorıń agenttigi nemese memlekettik menshiktegi kásiporyn bolsyn, jeke kásipkerlik nysany, ýnıversıtet, mektep bolsyn, adal eńbek etýge tıis. Árkim óz jumysyn jaqsy atqarsa, ony patrıot dep sanaımyz. Jalpy, tekserý sharalary memlekettiń áleýmettik mindettemelerine qatysty jumysqa kesirin tıgizbeýi kerek. Búdjet qarajatyn ýaqtyly ıgerýge de kedergi keltirmeýi qajet. Aqparattyq, komersıalyq qaýipsizdikti jáne jeke derekterdi qorǵaý máselesin nazarda ustaǵan jón", – dedi Qasym-Jomart Toqaev.