Memleket basshysy kıberqaýipsizdikti kúsheıtý máselesin kóterdi
– Jasandy ıntellektiniń damýymen qaýip-qaterdiń múldem jańa túrleri paıda boldy. Úırenshikti áreket etý mehanızmderi oǵan beıimdelip úlgermeı jatyr. Neırojeliler kómegimen adamnyń bıometrıalyq kóshirmesi jasalatynyn, daýysyn, bet álpetin, tipti minez-qulqyn aınytpaı salýǵa bolatynyn bárimiz kórip otyrmyz . Bul azamattardyń jeke málimeti men bank esepshottaryna qol jetkizýge, qoǵamdyq pikirdi burmalaıtyn jalǵan beınerolıkter jasaýǵa múmkindik beredi, – dedi Prezıdent.
Odan ári Memleket basshysy aqparattyq júıelerdiń osal tustaryna toqtaldy.
– Jyl basynan beri derekterdiń qoldy bolýyna baılanysty 40-tan astam fakti tirkeldi. Eń iri oqıǵa maýsym aıynda boldy. Mundaı ınsıdentterdiń basym bóligi jeke sektorda oryn alady. Biraq memleket elimizdegi sıfrlyq qaýipsizdiktiń jalpy deńgeıine tolyq jaýap berýge mindetti. Kıberqaýipsizdik salasyndaǵy búgingi ahýal quzyretterdiń durys bólinbeýi jáne shashyrańqylyǵy saldarynan kúrdelenip otyr. Bir jaǵynan aqparattyq qaýipsizdikke Sıfrlyq damý mınıstrligi quramyndaǵy Aqparattyq qaýipsizdik komıteti monıtorıń júrgizedi. Ekinshi jaǵynan qaýipsizdik talaptary boıynsha tehnıkalyq synaqtar júrgizý jáne sertıfıkattaý Ulttyq qaýipsizdik komıtetine baǵynyshty Memlekettik tehnıkalyq qyzmet quzyrynda. Biryńǵaı basqarý vertıkaliniń bolmaýy jáne fýnksıalardyń qaıtalanýy memlekettik organdardyń kıberqaýipke qarsy baıaý áreket etýine sebep bolady. Bul jaǵdaıdy tez arada túzeý kerek, – dedi Prezıdent.
Qasym-Jomart Toqaev qorǵalǵan komýnıkasıany qamtamasyz etýdi taǵy bir mańyzdy mindet retinde atady.
– Qazirgi kezde iskerlik jáne qyzmet babyndaǵy baılanystyń, sonyń ishinde azamattardyń jeke derekterin berý úderisiniń basym bóligi halyqaralyq messendjerler arqyly júzege asady. Bul platformalarda jeke sáıkestendirý nómirin, azamattardyń densaýlyǵy týraly málimetti jáne basqa da derekterdi jıi suraıdy. Mundaı tájirıbe jeke málimetterdi qorǵaý týraly zańnamaǵa qaıshy jáne ulttyq ıýrısdıksıadan tysqary jerge derekterdiń tarap ketýine ákelip soǵady. Qazaqstanda otandyq Aitu messendjeri ázirlendi. Ol tıisti qaýipsizdik deńgeıin qamtamasyz ete alady. Úkimet jeke derekterdi qoldanatyn barlyq komýnıkasıany qorǵalǵan ulttyq messendjerge kóshirý máselesin pysyqtaýy kerek, – dedi Qasym-Jomart Toqaev.