Qazaqstan prezıdenti Qasym-Jomart Toqaev AQSH astanasy Vashıngtonda Ázerbaıjan men Armenıa arasynda qol qoıylǵan beıbitshilik kelisimin tarıhı mańyzy bar jetistik dep atady, dep habarlaıdy Aqshamnews.kz Aqorda baspasóz qyzmetine silteme jasap.
Aqordanyń málimetinshe, bul qujat eki memleket arasyndaǵy uzaq jyldar boıy jalǵasqan áskerı qaqtyǵysty toqtatyp, turaqty beıbitshilik negizinde dıplomatıalyq qatynastar ornatýǵa jáne yntymaqtastyqty damytýǵa jol ashty.
Memleket basshysynyń pikirinshe, Ázerbaıjan men Armenıanyń mundaı kelisimge qol qoıýy – AQSH Prezıdenti Donald Tramptyń tegeýrindi ári tıimdi bitimgerlik mısıasynyń arqasy. Ol Ázerbaıjan jáne Armenıa basshylaryn saıası erik-jiger tanytyp, strategıalyq turǵydan kóregen sheshim qabyldaýǵa kóndire aldy.
Prezıdent Qasym-Jomart Toqaev Qazaqstan da eki el arasyndaǵy osynaý mańyzdy ýaǵdalastyqqa qol jetkizýge eleýli úles qosty dep sanaıdy.
Elimiz beıbit kelisimniń negizgi sharttaryna qatysty syrtqy ister mınıstrleriniń deńgeıindegi kelissóz alańy retinde Almaty qalasyn usyndy.
Mınıstrler arasyndaǵy kelissózder Almatyda ótti.