«Dáýlet» tenıs ortalyǵynda 12 jasqa deıingiler arasynda ótip jatqan Azıa komandalyq birinshiliginiń (ITF Asian 12&Under Team Championships 2021) jartylaı fınalynda Qazaqstan men Ózbekstan komandalary synǵa túsedi, dep habarlaıdy almaty-akshamy.kz QazAqparatqa silteme jasap
Qazaqstan tenıs federasıasy málim etkenindeı, qazaqstandyq qyzdar da, uldar da toptyq básekede jartylaı fınalǵa birinshi orynmen joldama aldy. Uldar taılandtyqtardan jeńilip qalǵannan keıin Iordanıamen machqa tastúıin daıyndyqpen shyqty. Aldymen ortalyq kortta óner kórsetken Madıar Taǵybekov Shatara Találmen básekede oıyn tizginin birden qolyna aldy. Qarsylasyna bir ǵana geım bergen Madıar aıqyn basymdylyq tanytty. Iaroslav Pshenıchnyı men Jaber Amır kezdesýinde birinshi sette qazaqstandyq tenısshi taı-breıkte jeńisti julyp aldy. Ekinshisinde Iaroslav esh múmkindik bergen joq – 6:0. Juptyq synda da Ia.Pshenıchnyı men M.Taǵybekov qarsylastaryn bet qaratpaı utty – 6:1, 6:0.
Qyzdar arasynda qazaqstandyqtar úndistandyqtarmen kortqa shyqty. Aldymen Evelına Balaganskaıa Maıe Revathıge ese jiberdi – 6:7, 4:6. Degenmen Eva Korysheva Harıtashrı Vekateshten aılasyn asyryp, tarazy basyn teńestirdi – 6:2, 6:4. Sońǵy básekede Sabına Shýhratova men E.Korysheva Revathı men Vekateshti súrindirdi – 6:2, 6:4. Osylaısha óz toptarynda úzdik shyqqan qazaqstandyq uldar men qyzdar fınalǵa shyǵý úshin Ózbekstan quramasymen talasatyn boldy.