Jetisý aýdanynyń komúnıtı ortalyǵynda «Taza Qazaqstan» respýblıkalyq bastamasy aıasynda «Qaǵaz boom» ekologıalyq aksıasy uıymdastyryldy, - dep habarlaıdy Aqshamnews.kz.
İs-sharanyń negizgi maqsaty – qoǵamda ekologıalyq mádenıetti damytý, qaldyqtardy bólek jınaý daǵdysyn qalyptastyrý jáne turǵyndardyń ekosanasyn arttyrý.
Aýdan turǵyndary, jastar men stýdentter belsendi qatysyp, qajetsiz gazetterdi, jýrnaldardy, karton men keńse qaǵazdaryn tapsyrdy. Shamamen 2 tonna makýlatýra jınalyp, arnaıy qabyldaý pýnktine jóneltildi.
«Qorshaǵan ortany qorǵaý – ortaq mindetimiz. Búgingi «Qaǵaz boom» aksıasyna turǵyndardyń belsendi qatysýy – qoǵamda ekologıalyq mádenıettiń ósip kele jatqanyn, azamattardyń ekologıa máselesine jaýapkershilikpen qaraı bastaǵanyn kórsetedi. Biz ekologıalyq bastamalardy odan ári damytyp, jastardy tabıǵatqa uqypty qaraýǵa tartýdy jalǵastyramyz», – dedi Jetisý aýdany komúnıtı-ortalyǵynyń jetekshisi Esen Ábdihalyq.
Uıymdastyrýshylardyń aıtýynsha, mundaı ekologıalyq is-sharalar turaqty túrde ótkizilip turady. Bul turǵyndardy qorshaǵan ortaǵa uqypty qaraý mádenıetin qalyptastyrýǵa múmkindik beredi.