QR Parlamenti Májilisinde salyq rýlıngi júıesin engizýge arnalǵan dóńgelek ústel ótti.
Bul tetik bızneske mámile jasamas buryn salyq mindettemeleri boıynsha resmı túsinikteme alýǵa múmkindik beredi, - dep habarlaıdy Aqshamnews.kz..
QR Qarjy vıse-mınıstri Erjan Birjanov aıtqandaı, bul júıe kompanıalarǵa josparlanǵan operasıalardy aldyn ala taldap, salyq organdarynan resmı túsiniktemeler alýǵa kómektesedi.
«Mysaly, belgili bir kompanıa taýarlardy jetkizýge baılanysty kelisimshartqa otyrýdy josparlasa, ol qandaı rejimde salyq tólep, esep júrgizetinin aldyn ala naqtylaı alady. Memlekettik organnyń mamandary osyndaı boljamdy mindettemeler boıynsha jaýap berýge mindetti», dedi Qarjy mınıstriniń orynbasary.
Tyń tetik jańartylǵan Salyq kodeksi sheńberinde kóldeneń monıtorıń formatynda iske asyryldy. Bul amal salyq tóleýshilerge óz qyzmeti týraly málimetti tolyqtaı ashyq etýge, al salyq organdaryna operasıalardy obektıvti baǵalap, syn-qaterdi azaıtýǵa jol ashady. Osy rette qazir kóldeneń monıtorıń boıynsha qanatqaqty joba iske asyrylyp, oǵan 25 iri kompanıa qatysyp jatqanyn aıta keteıik.
Dóńgelek ústelge jınalǵan azamattar monıtorıńtiń atalǵan túri ashyqtyqty qamtamasyz etip, ákimshilik júktemeni azaıtý men salyq daýlarynyń aldyn alýǵa septesetinin aıtty. Vıse-mınıstr ázirshe barlyq salyq tóleýshige aldyn-ala túsindirý tetigin qoldaný orynsyz ekenin jetkizdi. Bul operasıalardy egjeı-tegjeıli taldaý qajettiligine, salyq tártibine qoıylatyn joǵary talaptar men fıskaldy organdardyń shamadan tys júktelý qaýpine baılanysty.
Qarjy mınıstrligi jańa tásilge qoljetimdilikti keńeıtý úshin jıi qoıylatyn suraqtarǵa jaýaptar qarastyrylǵan derekter bazasyn qurýdy qolǵa aldy.
«Byltyr 400 myńǵa jýyq salyq tóleýshi QR Salyq kodeksiniń normalaryn túsindirýge ótinish bildirdi. Biz jasandy ıntellekt elementteri bar izdeý júıesin ázirlep jatyrmyz. Onda qarapaıym suraqtar qoıyp, qajetti jaýap alýǵa bolady», dedi E.Birjanov.