Alataý aýdanynda B. Momyshuly kóshesiniń batysyna qaraı jelili jańa saıabaq salynyp, 107,1 ga alańda 600-ge jýyq túrli aǵash otyrǵyzyldy.
Almaty ákimi Baqytjan Saǵyntaev «Almaty» TA-daǵy Akimat Live baǵdarlamasynyń tikeleı efırinde áleýmettik, óndiristik jáne ınfraqurylymdyq jańa nysandar týraly aıtyp berdi, dep habarlaıdy Almaty-akshamy.kz
Máselen, Rysqulov dańǵyly men Emsov kóshesiniń qıylysynda kópten kútken jolaıryq, sondaı-aq Abaı dańǵyly boıymen Momyshuly kóshesinen Alataý kóshesine deıin jáne odan ári qalanyń batys shekarasyna deıin ótpeli kólik qozǵalysy ashyldy.
Indýstrıaldy aımaqta úlken dıametrli dánekerlengen bolat qubyrlar shyǵaratyn zaýyt iske qosyldy. Budan basqa, Alataý aýdanynda Indýstrıaldy aımaq nysandarynyń órt qaýipsizdigin qamtamasyz etetin jańa zamanaýı órt sóndirý deposy ashyldy.
Sondaı-aq, Alataý aýdanynda B. Momyshuly kóshesiniń batysyna qaraı jelili jańa saıabaq salynyp, 107,1 ga alańda 600-ge jýyq túrli aǵash otyrǵyzyldy.
Áleýmettik nysandardyń ishinen qala ákimi Naýryzbaı aýdanynyń №36 emhanasy janynan zamanaýı KT-apparaty bar dıagnostıkalyq ortalyqtyń ashylǵanyn atap ótti. Sonymen qatar, Áýezov aýdanyndaǵy №186 balabaqsha kúrdeli jóndeýden ótip, seısmıkalyq kúsheıtilip ári jaldan soń qaıtarylyp ashyldy.
Aldaǵy kúnderi taǵy da birqatar nysandardy ashý josparlanyp otyr. Naýryzbaı jáne Áýezov aýdandarynda Nur Otan partıasynyń aýdandyq fılıaldarynyń jańa ǵımarattary ashylady. Naýryzbaı aýdanynda №7 QKA qabyldaý bólimshesiniń jańa korpýsy da iske qosylady. Alataý aýdanynyń Tomırıs jáne Naýryzbaı aýdanynyń Qalqaman shaǵynaýdandarynda jańa mektepter ashylady. Jetisý aýdanynda eki jańa DSK paıdalanýǵa beriledi.
Sondaı-aq, B. Saǵyntaev «Saryarqa» jáne «B. Momyshuly» metro stansıalarynyń jaqyn arada tehnıkalyq iske qosylatynyn eske saldy.
Budan basqa, halyqtyń áleýmettik osal toptarynan 211 otbasy «Nurly jer» memlekettik baǵdarlamasy aıasynda osy aýdandaǵy «Mádenıet» TK-nen páter kiltterin aldy.
Jaqynda 29 jasqa deıingi jumys isteıtin jastar da jańa qonystaryn atap ótti. Osy sanattaǵy almatylyqtarǵa barlyǵy 1 050 páter bólinedi. Qalalyq «Almaty Jastary» jeńildetilgen nesıe baǵdarlamasy boıynsha 926 nesıe berildi. Kópbalaly otbasylarǵa satyp alý quqyǵynsyz 267 jaldamaly páter bólindi.
B. Saǵyntaev jalpy bıyl kezekte turǵan 5 394 adamnyń páter alatynyn, onyń ishinde «Baqytty otbasy» respýblıkalyq baǵdarlamasy aıasynda kóp balaly, tolyq emes jáne múgedek balalardy tárbıelep otyrǵan otbasylar úshin 1 013 kredıttik zaem, «Shańyraq» baǵdarlamasy boıynsha kezekte turǵandardyń barlyq sanattary úshin 2146 kredıttik qaryz beriletinin atap ótti.