Táttimbet halyq aspaptar orkestri Túrkıa tórin ónerlerimen tamsandyrdy
Túrkıa elinde bolǵan gastróldik sapar kezinde Qaraǵandynyń Táttimbet atyndaǵy qazaq halyq aspaptary orkestri 10 myńnan astam kórermen aldynda óner kórsetip, dombyra men qobyz úni arqyly Uly dala tarıhyn júrekterge jetkize bildi, dep habarlaıdy Almaty-akshamy.kz
Óner ujymy Qazaqstan Táýelsizdiginiń 30 jyldyǵy men Dúnıejúzi qazaqtarynyń kishi quryltaıy aıasyndaǵy is-sharaǵa arnaıy shaqyrylǵan bolatyn.
Konserttik birlestiktiń jetekshisi Talǵat Ydyrysov kishi quryltaıǵa qatysyp, sonymen birge Alanıa, Antalıa, Hataı, Gazıantep, Ystanbul jáne Koná qalalarynda konsert bergenderin habardar etti.
Al Táttimbet orkestriniń dırıjeri Erlan Baqtygereı bolsa, túrik kórermenderiniń ulttyq mýzykalyq aspaptarymyzdyń únine aıryqsha tańǵalyp, erekshe áserge bólengenderin atap ótti.
Kópshilik aldynda óner ujymy Dáýletkereı, Qurmanǵazy, Táttimbet, Mahambettiń kúıleri men Nurǵısa Tilendıevtiń zamanaýı ánderin oryndaǵan. Sonymen qatar belgili túrik kompozıtorlarynyń shyǵarmalary, túrik ánderine popýrrı oryndaldy. Dırıjerdiń aıtýynsha, kórermenderge unaǵany sonshalyq, tipti olar oryndarynan turyp ketip, bı bılep,án salǵan.
Aldaǵy kúnderi atalǵan óner ujymy jańa konserttik maýsymyn ashady. Orkestr repertýarynda qazaq jáne orys klassıkteriniń shyǵarmalary, sondaı-aq gastrolder baǵdarlamasynan ánder bolady dep josparlanǵan.