Almatynyń jańa ETJ-da qala turǵyndary úshin áleýmettik nysandardyń qadamdyq qoljetimdiligi qarastyrylǵan
Almaty ákimdigi qalanyń 2040 jylǵa deıingi Bas josparyna sáıkes ázirlengen egjeı-tegjeıli josparlaý jobalaryn (ETJ) bekitti. Ózderińizge málim, Bas josparda megapolısti damytýdyń monosentrıstik modelinen polısentrlikke kóshý qaǵıdasy kórsetilgen, ıaǵnı qala «Shyǵys qaqpasy», «Tarıhı ortalyq», «Soltústik», «Ońtústik-batys», «Batys» syndy 5 qoǵamdyq jáne iskerlik qyzmet ortalyǵyna bólinedi.
Almatynyń damýynyń negizgi qaǵıdasynyń biri balabaqshalarǵa, mektepterge, medısınalyq mekemelerge jáne aıaldamalarǵa jaqyn mańdaǵy qoljetimdilik bolyp tabylady.
Almaty qalalyq josparlaý jáne ýrbanıstıka basqarmasynyń habarlaýynsha, megapolıste núkteli qurylys bolmaıdy, barlyq qaıta jańartý jobasy qajetti ınjenerlik, komersıalyq jáne áleýmettik ınfraqurylymmen qamtamasyz etilýin eskere otyryp, keshendi túrde qaralady.
ETJ boıynsha 2040 jylǵa qaraı árbir qala turǵyny úshin balabaqshalar úıden orta eseppen 300 metr jerde, mektepten 500 metr qashyqtyqta, al medısınalyq mekemeler turǵylyqty jerinen eń kóbi bir shaqyrym jerde bolady dep kózdelgen.
Mysaly, Túrksib aýdanynda mektepter men medısınalyq mekemelerdiń sany 1,5 ese, balabaqshalar sany 3 ese ósedi. 7 dene shynyqtyrý-saýyqtyrý kesheni salynady.
Naýryzbaı aýdanynda mektepter sany 2 ese balabaqshalar sany 10 esege artyp keledi. Sonymen qatar, 11 jańa medısınalyq mekeme, 8 dene shynyqtyrý-saýyqtyrý kesheni, mýzeı, eki jańa teatr men kitaphana josparlanǵan.
ETJ-ǵa sáıkes, Bostandyq aýdanynda 8 mektep, 5 balabaqsha, 3 medısınalyq mekeme, 2 dene shynyqtyrý-saýyqtyrý kesheni syndy jańa áleýmettik ınfraqurylym qurý ǵana emes, sonymen qatar, 4 kitaphana, 1 mýzeı, 1 teatr syndy jańa mádenı nysandar qurý da kózdelgen.
Almaly aýdanynda jańa áleýmettik ınfraqurylym qurý negizinen mektepterge baǵyttalǵan – bul 8 nysan jáne 10 balabaqsha. Mýzeıdiń de qurylysy josparlanǵan.
Medeý aýdanynyń aýmaǵyndaǵy áleýmettik ınfraqurylym qazirgi olqylyqtyń ornyn toltyrýǵa baǵyttalǵan: bul 14 mektep, 16 balabaqsha, 11 medısınalyq mekeme, 5 dene shynyqtyrý-saýyqtyrý kesheni jáne kitaphana.
Jolaýshylar ınfraqurylymyn keńeıtý kózdelip otyr, 2027 jylǵa qaraı – qazirgi qoldanystaǵy 1208 aıaldamadan 1245 aıaldamaǵa deıin artyp, eń jaqyn aıaldama keshenine 5-7 mınýt ishinde barýǵa bolady.
Jalpy, ETJ turaqty jáne fýnksıonaldy qalalyq keńistik qurýǵa baǵyttalǵan. Ol qala qurylysyn aımaqtarǵa bólýdiń, qyzyl syzyqtardyń, halyqqa áleýmettik, mádenı jáne komýnaldyq qyzmet kórsetý nysandaryn ornalastyrý úshin aýmaqtardy rezervteýdiń, kóshe-jol jelisin uıymdastyrýdyń, ınjenerlik komýnıkasıalardy júrgizýdiń, aýmaqtardy abattandyrý men kógaldandyrýdyń negizgi baǵyttaryn belgileıdi.