Tehnıka kanalǵa qulap ketken
Sońǵy qońyraý tarazdyq oqýshylar úshin qaıǵyly aıaqtala jazdady, dep habarlaıdy Almaty-akshamy.kz «Habar 24» telearnasyna silteme jasap.
Mektep túlekteri mingen kólik tereń kanalǵa qulap, batyp ketýge shaq qaldy. Oqys oqıǵa Qazaq handyǵy monýmentiniń janynda boldy. Kýágerlerdiń sózinshe, oqýshylar lyq toly onshaqty kólik ábden oıqastaǵan kórinedi. Kenetten tehnıka kanalǵa qulap ketken. Biraq sýǵa batpaı, betonǵa qıǵashtap turyp qalǵan.
Polısıanyń málimetinshe 21 jastaǵy júrgizýshi kólikti ýaqytsha qaldyryp ketkende 17 jastaǵy mektep túlegi rólge otyrǵan.
«Jasóspirim tejegish pen gazdy shatastyryp, jol kólik oqıǵasyn jasady. Eń bastysy jasóspirim zardap shekken joq. Oqýshy ákimshilik quqyqbuzýshylyq týraly Kodekstiń 612 baby 2-bóligimen jaýapkershilikke tartyldy. Jáne ata-analarynyń qatysýymen túsindirý jumystary júrgizilýde»,-deıdi oblystyq PD baspasóz hatshysy Gúlsara Muhtarqulova.