Saperlar qaýipti zatty syrtqa shyǵaryp, aýla ishinde jarǵan
Mektepke barǵym kelmeıdi. Bilim ordasyna jarylǵysh zat qoıǵan oqýshy qyz bul áreketke ne úshin barǵanyn osylaı túsindirdi, dep habarlaıdy Almaty-akshamy.kz Almaty.tv-ge silteme jasap.
Keshe keshke Kókshetaýdaǵy №2 mektep-lıseıinen kúdikti zatty baıqaǵan qyzmetkerler birden tártip saqshylaryna habarlasqan. Saperlar der kezinde qaýipti zatty syrtqa shyǵaryp, aýla ishinde jarǵan.
«Tabylǵan zat temir symdary bar, qoldan jasalǵan jarylǵysh zatqa uqsaıdy. Oqıǵa ornyna barǵan polıseıler men mamandar ony ǵımarattan shyǵaryp, mektep aýlasynda jarý týraly sheshim qabyldaǵan. Abyroı bolǵanda ol kezde mektepte eshkim bolmady. Qazir bul isti uıymdastarǵan oqýshy qyzdy profılaktıkalyq esepke qoıý týraly máseleni qarastyryp jatyr», – dedi Oblystyq polısıa departamentiniń resmı ókili Ásıma Ábdirahmanova.