Sottalǵandar 1 mln teńge kóleminde grantqa ıe bolyp, óz bıznesterin ashty.
Taldyqorǵan qalasy probasıa qyzmetiniń esebinde turǵan úsh sottalǵan konkýrstyq negizde bir mıllıon teńge kóleminde grantqa ıe bolyp, óz bıznesterin ashty, dep habarlaıdy Almaty-akshamy.kz.
İshki ister mınıstrliginiń resmı saıtyndaǵy derek boıynsha, Almaty oblysy boıynsha QAJD qarasty Taldyqorǵan qalalyq probasıa qyzmeti bólimi, Almaty oblysynyń prokýratýrasy jáne «Taldyqorǵan óńirlik jumyspen qamtýǵa járdemdesý qory» qoǵamdyq qorymen birlesip, «Almaty oblysy ákimdiginiń ishki saıasat basqarmasy» MM qoldaýymen probasıa qyzmetinde esepte turǵan sottalǵandar qatarynan áleýmettik kásipkerlik salasynda óz isin iske asyrý úshin bir mıllıon teńge mólsherinde grant berý maqsatynda «Ekinshi múmkindik» jobasyn iske asyrdy.
Bul jobaǵa Taldyqorǵan probasıa qyzmetiniń esebinde turǵan sottalǵan adamdar jáne qamaý oryndarynan bosatylǵan adamdar qatysty.
Uıymdastyrýshylar «Óz áleýmettik bıznesińdi basta» atty oqytý semınaryn ótkizdi. Oqytý ár túrli is-sharalardy uıymdastyrý ádisimen ótti. Oqý semınary aıaqtalǵannan keıin fınalǵa shyqqandar ózderiniń bıznes-jobalarynyń prezentasıalaryn qorǵady.
Baıqaý komısıasynyń sheshimi boıynsha, Taldyqorǵan qalasyndaǵy probasıa qyzmetiniń úsh sottalýshysy árqaısysyna 1 mln. teńge kóleminde grant berildi. Granttar káriz qudyqtaryn tazalaý, dánekerleý jumystaryna jáne shashtaraz qyzmetterine qajet jabdyqtardy satyp alý úshin paıdalanylatyn bolady.
«Taldyqorǵan qalasynyń probasıa qyzmetiniń jáne jalpy Almaty oblysy boıynsha QAJD qyzmetkerlerine biz úshin osyndaı qıyn ýaqytta óz bıznesin ashýǵa múmkindik bergeni úshin alǵysymdy bildiremin. Maǵan shashtaraz ashý úshin jabdyq satyp alýǵa kómektesti, men sulýlyq salonyn ashtym. Maǵan sengenderińiz úshin kóp rahmet! Árıne, jeńý ońaı bolǵan joq. Men óz isimdi ashqanyma qýanyshtymyn», – deıdi grant ıegerleriniń biri.
Almaty oblysynda probasıa qyzmetiniń esebinde turǵan adamdarǵa memleketten óteýsiz granttar berý jyl saıynǵy dástúrge aınaldy.
«Esterińizge sala keteıik, osy jobanyń arqasynda eki sottalýshy shınomontaj jáne plasıkalyq terezeler men esikter jasaý boıynsha óz bıznesin sátti damytýda», – dep atap ótti Almaty oblysy boıynsha QAJD bastyǵynyń orynbasary Jánibek Qosjanov.