Aýrýhanaǵa 3-4 kún buryn túsken
Taldyqorǵan qalasynyń ákimi Áset Masabaev jansaqtaý bólimine tústi, dep habarlaıdy Almaty-akshamy.kz Massaget.kz saıtyna silteme jasap.
Bul týraly jýrnalıs, bloger Sandýǵash Dúısenova Instagram-paraqshasynda habarlaǵan bolatyn. Aqparattyń mán-jaıyn anyqtaý maqsatynda Massaget.kz tilshisi Áset Masabaevtyń ókili Mádı Shákenovke habarlasty.
"Bul ras aqparat. Biraq qazir ákimniń jaǵdaıy turaqty. Jaǵdaıy durystaldy. Qazir jalpy palatada jatyr. Jansaqtaý bólimine júıke júıesine baılanysty aýrýhanaǵa 3-4 kún buryn túsken. Jansaqtaý bóliminde eki kúndeı jatty", - deıdi Mádı Shákenov.
Aıta keteıik, Taldyqorǵan qalasynyń ákimi Áset Masabaev 1985 jyly Almaty oblysynda týǵan. Eńbek jolyn 2007 jyly "Almaty elektr stansıasynda" elektromonter bolyp bastaǵan.
2008 jyldan 2010 jyldary "Naz" JSHS-de bas energetık, "Almaz jáne KÚS" JSHS-de tehnıkalyq dırektor bolyp jumys istegen.
2010 jyldan 2013 jyldary Almaty qalasy Energetıka jáne komýnaldyq sharýashylyq basqarmasynda jetekshi mamannyń mindetin atqarýshydan energıa, jylýmen qamtý bóliminiń bastyǵyna deıingi joldardan ótken.
Ár jyldary Jetisý jáne Medeý aýdandary ákimderiniń orynbasary, Almaty qalasy ákiminiń bas ınspektory, qalanyń Tabıǵı resýrstar jáne tabıǵatty paıdalaný basqarmasynyń, Energotıimdilik jáne ınfraqurylymdyq damý basqarmasynyń basshysy bolǵan.
2019 jyldyń sáýir aıynan bastap Almaty qalasynyń Energotıimdilik jáne ınfraqurylymdyq damý basqarmasynyń basshysy qyzmetin atqarǵan.
2019-2020 jyldary - Almaty qalasy energıa tıimdiligi jáne ınfraqurylymdyq damý basqarmasynyń basshysy. 2020 jylǵy 12 qyrkúıek Almaty qalasy Medeý aýdanynyń ákimi.
2022 jylǵy 04 naýryzdan bastap Taldyqorǵan qalasynyń ákimi.