Jeli qoldanýshylarynyń aıtýynsha, taksı júrgizýshisine aýyr sózder aıtqan — Talǵar aýdandyq qoǵamdyq keńestiń múshesi.
Almaty oblysynyń polıseıleri taksı júrgizýshisimen dóreki sóılesip, esigin tars jaýyp, kóligin teýip ketken er adamdy izdep jatyr. Oqıǵanyń vıdeosy áleýmettik jelilerde tarady,dep habarlaıdy Almaty-akshamy.kz
Almaty oblystyq polısıa departamentiniń málimetinshe, qazirgi ýaqytta taksı júrgizýshisimen janjaldasqan adamdy izdestirý jumystary júrgizilýde.
«Qazirgi ýaqytta Talǵar aýdandyq polısıa bóliminiń qyzmetkerleri bul faktini hattamamen tirkedi. Prosesýaldyq sheshim qabyldaý úshin oqıǵaǵa qatysýshylardyń turǵylyqty jerin anyqtaý boıynsha izdestirý sharalary júrgizilýde», - dep habarlady Almaty oblysy İİD baspasóz qyzmeti.
Almaty oblysynyń ákimdigi onyń Talǵar aýdandyq qoǵamdyq keńesiniń múshesi ekenin rastady.
«Áleýmettik jelilerde Talǵar qalasynda taksı júrgizýshisi men jolaýshy arasyndaǵy janjal túsirilgen vıdeo taralýda. Keıbir aqparat kózderi jolaýshy Gúldala aýylyndaǵy meshittiń ımamy ekenin aıtady. Alaıda Almaty oblysynyń din isteri basqarmasy onyń ımam emes ekenin málimdedi. Atalǵan er adam Talǵar aýdandyq qoǵamdyq keńesiniń múshesi ekenin habarlaımyz. Jalǵan aqparat taratpaýyńyzdy suraımyz», – dep habarlady aýdan ákimdigi.