Túrkistan oblysynda sýsyz ómir súre alatyn balyq tirshilik etedi, dep habarlaıdy Almaty-akshamy.kz Inform.kz-ke silteme jasap.
Jylanbas dep atalatyn balyq óńirdegi barlyq sý aıdyndarynda kezdesedi. Ottegini erkin tutyna alatyn ol birshama ýaqytqa deıin qurǵaq jerde de esh qınalmaı tirshilik etedi.
«Bul balyq shópti jerde ómir súredi. Ystyqty jaqsy kóredi. Negizinen kishkentaı qustar men sý jándikterimen qorektenedi. Ásirese, baqalardy jaqsy kóredi», - deıdi Túrkistan oblysy boıynsha sporttyq balyq aýlaý federasıasynyń prezıdenti Sergeı Efremov.
Jalpy, jylanbas balyǵynyń uzyndyǵy bir metrdiń jobasyn quraıdy eken. Tipti odan da uzyndary bar. Al, salmaǵyn 10 keliden kóp.
«Jylanbas balyǵynyń 16 keliligin aýlaǵan dostarym boldy. Qarmaqtyń ınesin tereńge jutyp qoıǵandyqtan, kóbine balyqshylar saýsaǵyn jaralap alady. Al, negizi adamdarǵa shabýyl jasamaıdy. Sondyqtan esh qoryqpaı, qasynda shomyla berýge bolady»,-deıdi Sergeı Efremov.