QazUAZÝ stýdentteri jeke menshikke ótip ketken oqý ǵımarattaryn qaıtarý máselesin kóterdi.
Qazaq ulttyq agrarlyq zertteý ýnıversıtetiniń Basqarma Tóraǵasy – Rektory, QR UǴA akademıgi Kúrishbaev Aqylbek Qajyǵululynyń stýdent jastarmen kezdesýinde alǵash ret joǵary oqý ornyndaǵy sybaılas jemqorlyq máselesi ashyq alańda talqylandy, dep habarlaıdy Almaty-akshamy.kz
«Bizdiń búgingi maqsatymyz – oqytýshylar men stýdentter arasynda qandaı da bir sybaılastyq kórinisteriniń bolýyna jol bermeý, jastardy jemqorlyqqa tózbeýge shaqyrý, sybaılas jemqorlyqqa qarsy mádenıet deńgeıin joǵarylatý, sol arqyly oqý prosesiniń sapasyn kóterýge yqpal etý. Osyǵan baılanysty, ýnıversıtet basshylyǵy men stýdentter arasynda áriptestik senimdi baılanys ornatý úshin ózderińizben ashyq dıalogqa kelip otyrmyn», - dedi óz sózinde Aqylbek Qajyǵululy.
Iá, ustaz ben shákirt arasyndaǵy sybaılastyq pen jeń ushynan jalǵasý – bular ózara qabyspaıtyn, múldem kereǵar uǵymdar ekeni belgili. Nege deseńiz, elge erteń qyzmet etetin bolashaq mamandardy tárbıelep, daıarlaıtyn sanaly oqytýshylardy jemqor retinde elestetýdiń ózi qıyn.
Ókinishke qaraı, kezdesý barysynda sóılegen stýdentter ýnıversıtet ómirinde para suraýǵa beıim jandar ushyrasatynyn, sabaqqa kelmese de joǵary bal alatyn bilim alýshylardyń az emestigin, grant bólýde keıbir oqytýshylardyń qysastyq jasaıtynyn jasyrmaı ortaǵa saldy. Sybaılas jemqorlyq faktileri mynandaı jaǵdaıda: stýdentter sabaqtan qalǵanda, aralyq baqylaýdy nemese pándik jumystardy qolmen jazyp tapsyrý kezinde, emtıhandardy qaıta tapsyrý, kýrstyq jumystar qorǵaý sátterinde muǵalimmen betpe-bet qalǵanda jıi kezdesetini atap ótildi. Stýdentter sybaılas jemqorlyqtyń biraz naqty faktilerin atap ótti.
Sonymen qatar, stýdentter kezinde jeke menshikke ótip ketken ýnıversıtettiń oqý ǵımarattaryn, stýdenttik jataqhanany, stadıondy, jer ýchaskelerin memleketke qaıtarý máselesin kóterdi.
Ózderimen osyndaı ashyq alańdy uıymdastyrǵan ýnıversıtet basshylyǵyna rızashylyqtaryn bildirgen stýdentterdiń oı-pikrleri men usynystaryn tyńdaı kele, Aqylbek Kúrishbaev olardyń saýaldaryna jaýaptar qaıtardy. Sonymen birge, oqytýshylar men bilim alýshylar arasyndaǵy ashyqtyq pen ózara senim men baılanystardy odan ary nyǵaıtý maqsatynda prorektorlar men tıisti qurylym basshylaryna naqty tapsyrmalar berdi.
«Ózderińiz jaqsy bilesizder, Memleket basshysy Qasym-Jomart Toqaev «Bizdiń ortaq maqsatymyz – zań men tártip ústemdik quratyn, azamattardyń quqyǵyna laıyqty qurmet kórsetiletin Ádiletti Qazaqstandy qurý» degen sózdi udaıy aıtyp keledi. Jemqorlyqsyz ádiletti ýnıversıtet qurý – bizdiń de túpki maqsatymyz. Búgingideı ózara senimge negizdelgen sharalar sybaılas jemqorlyqqa qarsy qozǵalystyń negizi bolyp tabylady. Aldaǵy ýaqytta sybaılas jemqorlyqqa qarsy ýnıversıtet Baǵdarlamasyn qabyldaıtyn bolamyz», - dedi sóziniń qorytyndysynda Aqylbek Qajyǵululy.