Almaty qalasynda Qazaq ulttyq agrarlyq zertteý ýnıversıtetiniń uıymdastyrýymen Oljas Súleımenovtiń júldesine arnalǵan voleıboldan ardagerler komandalary arasynda HV Halyqaralyq týrnır bolyp ótti, dep habarlaıdy Almaty-akshamy.kz.
Sporttyq is-sharaǵa QazUAZÝ Basqarma tóraǵasy-rektor, akademık Tilektes Espolov, Qazaqstannyń belgili memleket jáne qoǵam qaıratkerleri: aqyn, dıplomat jáne ádebıettanýshy Oljas Súleımenov, general-leıtenant Amangeldi Shabdarbaev, Amandyq Batalov, Ǵanı Qasymov, t.b. kórnekti tulǵalar qatysyp, týrnırge qatysýshylarǵa lebizderin bildirdi.
«Ol - álemge tanylǵan arqaly aqyn ǵana emes, halyqaralyq dárejedegi belgili memleket jáne qoǵam qaıratkeri, Qazaqstannyń Eńbek Eri, kóp jyldar boıy Qazaqstannyń IýNESKO-daǵy Turaqty ókili bolyp qyzmet atqarǵan izgi júrekti azamat. Sonymen qatar, voleıbol sportynyń shyn berilgen jankúıeri, ózi de talaı jyldar boıy ýnıversıtetimizdegi týrnırlerde óner kórsetip keledi. Ýnıversıtette 2004 jyldan bastap zıatkerlik, joǵary mádenıetti jáne kóptildi tulǵany qalyptastyrýǵa baǵyttalǵan «Oljas Súleımenov atyndaǵy áleýmettik-gýmanıtarlyq bilim jáne tárbıe ınstıtýty» jumys isteıdi. Oljas Omarulynyń ózi de atalǵan ortalyqta stýdenttermen jıi kezdesip, aq batasyn berip júr», – dedi rektor T.Espolov.
Joǵary oqý ornynda bilim alýshylardyń sporttyq qyrynan damýyna turaqty túrde erekshe kóńil bólinetinin ataı ketken jón. Stýdentter arasynda da, sondaı-aq ýnıversıtettiń profesorlyq-oqytýshylyq quramy arasynda da salaýatty ómir saltyn qalyptastyrýǵa baǵyttalǵan sporttyq is-sharalar júıeli túrde júrgizilip keledi.
Mysaly, profesor-oqytýshylar quramy men ýnıversıtet qyzmetkerleri arasynda sporttyń 8 túrinen «Densaýlyq» spartakıadasy; ýnıversıtet stýdentteri arasynda sporttyń 15 túrinen dástúrli fakúltetaralyq spartakıada; fýtboldan T.Segizbaevtyń, voleıboldan O.Súleımenovtiń júldesine jáne O.Jarylǵapovty eske alýǵa arnalǵan týrnırler dástúrli túrde ótedi. Sondaı-aq, JOO-da sporttyń 16 túri boıynsha sporttyq seksıalary bar sporttyq klýb jumys isteıdi. Sonyń ishinde voleıbol, fýtbol, boks, erkin kúres, sambo, dzúdo, taekvondo, toǵyzqumalaq, shahmat, atletıkalyq gımnastıka seksıalarynyń qatysýshylary respýblıkalyq jáne halyqaralyq jarystarda joǵary nátıjeler kórsetýde.
– Atap aıtqanda, 2021 jyldyń 4-5 qarashasynda Sankt-Peterbýrg qalasynda ótken ardagerler komandalary arasynda «ATLETTA VOLLEY CUP» halyqaralyq voleıbol týrnırinde bizdiń komanda 1-shi orynǵa ıe boldy! QazUAZÝ komandasy Máskeýden kelgen «Lých» jáne Sankt-Peterbýrgten kelgen «Soltústik Palmıra» sıaqty eń myqty komandalardy jeńdi. KSRO-nyń eńbek sińirgen jattyqtyrýshysy A.V.Kılchevskııdi (Máskeý) eske alýǵa arnalǵan XXXII dástúrli halyqaralyq týrnırdiń jáne «SPB Volley Master 2021» (Sankt-Peterbýrg) týrnıriniń chempıondary atandy. TMD elderiniń birde-bir ardagerler komandasy mundaı jetistikke qol jetkize almaǵanyn ataı ketken artyq bolmas, – dedi T.Espolov.
Joǵaryda atalǵan sporttyq nátıjeler QazUAZÝ tek bilim men ǵylym salasynda ǵana emes, sportta da kóshbasshy ekenin taǵy da dáleldeıdi. Oqý orny respýblıkadaǵy ardagerler voleıbolynyń biregeı bazasyna aınaldy jáne buqaralyq sportty damytýǵa úlken úles qosty.
Ardager komandalar arasyndaǵy XV halyqaralyq voleıbol týrnırine tańdaýly degen 10 komanda qatysty. Jankúıerlerine qyzyqty oıyn men shýaqty kóńil kúı syılaǵan voleıbol merekesinde ardager sprotshylar ózderiniń bar sheberlikterin kórsetti.
Nátıjesinde tórt komanda jartylaı fınalǵa shyqty: «Atameken-AGRO» (NurSultan qalasy, komanda kapıtany Erlan Tasyrov), «Tashkent» (Ózbekstan, Karımjan Rahımkýlov), «QazUAZÝ» (Almaty qalasy, Tilektes Espolov), «Jetisý» (Almaty oblysy, Dáýlet Imandosov).
Al fınalda baq synasqan «AtamekenAGRO» men «QazUAZÝ» komandalary arasyn daǵy dodada bas júldeni agroýnıversıtettiń ardagerleri qanjyǵasyna baılady. Al júldeli úshinshi orynǵa talasqan «Jetisý» men «Tashkent» komandalarynyń arasynda kórshi eldiń qonaqtarynyń baǵy jandy. Ardagerler komandalary arasyndaǵy HV Halyqaralyq týrnırdiń jeńimpazdaryn aqyn Oljas Súleımenov quttyqtap, júldelerin tabystady.