Qyzylordada jasóspirimdi soqqyǵa jyqqan 5 oqýshy polısıaǵa jetkizildi.
Qyzylorda oblysy Qazaly aýdanynyń dárigerleri aıaýsyz soqqyǵa jyǵylǵan jasóspirimniń jaǵdaıyn aıtty, dep habarlaıdy Almaty-akshamy.kz.
Oblystyq densaýlyq saqtaý basqarmasynyń málimetinshe, 15 jastaǵy stýdent "jedel járdemmen" aýrýhanaǵa 6 sáýirde jetkizilgen. Ol bas-mı jaraqatyn alǵan.
«Jábirlenýshi dereý aýrýhananyń qabyldaý bóliminde qaralyp, bas-mı jaraqatymen hırýrgıalyq bólimshege jatqyzyldy. 8 sáýirde ata-anasynyń ótinishi boıynsha ol Qazaly aýdandyq temirjol aýrýhanasyna jatqyzyldy», - delingen habarlamada.
Dárigerlerdiń aıtýynsha, zardap shegýshige tıisti medısınalyq kómek kórsetilip, bas súıeginiń rentgenografıasy men kompúterlik tomografıasy jasalyp, ish qýysynyń, búırektiń últradybystyq zertteýi júrgizilgen. Sondaı-aq ol nevropatolog pen oftalmologqa qaralyp, neırohırýrgtyń keńesin alǵan.
«Jalpy jaǵdaıy turaqty jáne aýyr. Qajetti medısınalyq sharalar jalǵasady», - dep qosty oblystyq densaýlyq saqtaý basqarmasynyń ókili.
Oqıǵaǵa Qazaly aýdandyq ákimdigi jaýap berdi. Ákimdiktiń resmı jaýabynda oqıǵanyń barlyq mán-jaıy anyqtalyp jatqany aıtylǵan.
«Tóbeleske qatysýshylar anyqtaldy. Olardyń barlyǵy - Qazaly aýdany, Áıteke bı kentindegi №266 mektep-lıseıdiń kámelettik jasqa tolmaǵan oqýshylary», - delingen ákimdik habarlamasynda.
Aıta ketelik, áleýmettik jelide jasóspirimdi belgisiz azamattardyń uryp-soǵyp jatqany jóninde beınekórinis jarıalanǵan edi.
Nátıjesinde, beınerolıkte kórsetilgen kámeletke tolmaǵandy uryp-soqqan adamdar anyqtalǵan. Qyzylorda oblysynda jasóspirimdi uryp-soqqan 5 oqýshy anyqtalyp, aýdandyq polısıa bólimine jetkizildi.
«Bul boıynsha Qazaly aýdany polısıa bóliminiń sotqa deıingi tergep tekserýdiń birińǵaı tizilimine QR Qylmystyq kodeksiniń 293-babynyń 2-bóligimen (buzaqylyq) is tirkeldi. Tergeý júrip jatyr. Tıisti saraptamalar taǵaıyndaldy. Kúdiktiler polısıa bólimine jetkizildi», - dep málim etti Qyzylorda oblystyq polısıa departamentinen.
Bul fakt boıynsha tergeý bastaldy.